Kay Armenia shinallatak Kullpa llaktakunapi ancha llakikuna allpa suchurishkamanta, ka´kayashkamanta, mayupash harkarishpa kuchayashkamanta rikurikukpi, Mamallakta Tantanakuyka llakta pushak, Guillermo Lasso runata Chunchi kitipi Estado de excepción paktayta kallarichichun mañan.
Kamachi killkakkunaka kay llakta llakipi urmana achka rikurishkamanta shinallatak estado de emergencia kallarichishka mana pakta kashkamanta, tukuy yanapaykunata utkashpa chayachinapak kullki illashkamanta shinallatak llakipi kawsakuk ayllukunatapash yanapanapak mana paktashkamantami mañanchik ninmi.
Patricia Núñez, kay yuyarinakushka killkata chayachik, Chunchi kitilli hatun llakipi kawsakushkatami riksichirka, kay llaktapika 20 waranka yalli ayllukunami kawsankuna, Kay mañaywanka utkashpa llakipi kawsakukta, llakikunamanta kishpirinata, wakllirinalla ayllukunata yanapanapak shinallatak kay llakta llakimanta mancharishka kawsakuktapash kutinpash sinchiyashpa wiñarichun yanapanapakmi mashkakunchik, nirkami.
Tawka kuskapi allpa suchurishpa ayllukuna wañushkatapash rimarka, llaktapak upyana yaku tututa shinallatak antakuru purina ñantapash wakllichirka. Kay llaktapika hatun llaki paktanallami kan shinaka kaypi kawsak ayllukunapak mutsushkatapash pampanallami rikurin, nirkami.
Tukuykuna chayamushka
Walter Narváez, Chunchi kiti pushak, kay kitipi llakikuna imashinalla paktakukta willashka kipa, kay llaktapi kawsakuk ayllukunata yanapanapak shinallatak kawsayta ukllanapakpash yanapayta karachun kayachirka. Utkashpa willayta kaparikta, patakuna tunirikukpi pirkakunata runa, ñankunapak katakunata allichina, chakakunata rurana, tarpuna allpa yakuta chayachina, shukta ruraykunapashmi mutsurin, nirkami.
Kay pandemia unkuykuna pachakunapipash urku tukyashpa kushnipashmi llakichirka shinallatak shuk hatun mancharina allpasuchuripash tiyarka, 30 hunu métros cúbicos allpami 145 hectáreas allpata suchuchirka kay llakipika 718 wiwakunami wañurka, kay charishkami llaktayukpak kawsayka kan, nirkami.
Alli paktarishkamanta
Kamachi killkakkunaka kay suyu llaktapi pachamama kutin kutin llakichishkata rimarkakuna, kayshina llakikunaka llaktapak kullki llankaypimi anchata wakllichishka shinallatak ayllukunata wakchayachishkapash, chayamatami llakta pushakta ashtawan llakikuna amana chayachun yanapayta mañarka.
Jhon Vinueza kamachi killkak, Chunchi llaktaka pampariy ushanmi kayshina mañashka yanapayta mana chayachikpika shinallatak allpa suchurishpaka llaktayukkunatami anchata llakichishka. Rafael Lucero kamachi killkak, allpa suchurirshpaka wasikunata, tarpushkakunata, wiwakunatapashmi kay kitipika llakichirka. Kay kitipi llakita kawsakuk ayllukunaman tukuykuna makipurashka yanapayta chayachinami ancha mutsurin, nirkami.
Jessica Castillo warmika kay Declaración Universal de los Derechos Humanos killkawanka, tukuy ayllukuna pakta kawsanapakmi kayachin nirkami. Mariano Curicama kamachi killkak runaka Chunchi kiti llaktapak allpaka ancha suchurinallami kan, ninmi.
Soledad Diab, llakikunata harkanapak ruraykunapimi pakta llankana mutsurin nirkami, shinallatak Pierina Correa kamachi killkakpash kayshina yuyayman kimirini, Chunchi llakta ayllukunapak kawsayta yanapankapak, nirkakunami
Salvador Quishpe kamachi killkak, mamallaktapika tawka ayllu llaktakunami pakta hayñikunata chayachichun mutsun, shinallatak telefónicas llankakkunawan yuyaypaktarishkata kutin rikunapakpash kayachirka, "shuk watapi 900 hunu dólar kullkitami sakinkuna" kaywan llaktakunata yanapankapak, nirkami.
Shinallatak Diego Ordoñez kay estado de excepción paktayta kallarichinapak tawka rikuykanatami paktana kanchik nirka, shinallatak Fernando Villavicencio kamachi killkak nirkami kayshina llakikunataka llakta mutsushkamanta utkashpami yanapaywan chayana kan, nirkami.
RSA/pv/cg-k
Ashtawan shuyukuna:
