Kamachi killkakkunapak shinallatak kamachi awllikunapak kawsayta kay Covid-19 pandemia unkuywan nuñanchik llaktapi paktarikushkapi ukllashpa katinkapak yuyaywanmi Consejo de Administración Legislativa (CAL) tantanakuyka tukuy LlankayWankurita pushakkuna chaypi kashkawan tukuykuna kimirishpa llankayta teletrabajo llikapillatak shamuk 17 puncha kulla killakama katinkapak yuyarirkakuna. CAL tantanakuyka shamuk inti 15 punchami kutin tantarinka, kaypimi llankay imashina paktanata kutinpash rikushpa yuyayrinkakuna.
Kunan punchakamaka, Mamallakta Tantanakuypika patsak yalli llankak ayllukunami unkuywan riksishka manarak riksishkapash tiyankuna, paykunami kay Covid-19 mushuk unkuypi urmashkakuna rikurin, kay willaykunaka llankay wankuri pushakkuna ukupimi riksishka kana kan, shuktak riksishka yuyaypash tiyay ushashkamanta.
Kamachi rurana killkata allichinapak arinishka
CAL, kay inti 9 puncha kulla killa rimanakuypimi, tukuykuna arinishkawan sukta kamachi rurana killkata allichinapak arinirkakuna shinallatak wiñaypak yachak minkarishkakunaman allichiynata kallarichun chayachinapakmi yuyarirkakuna.
Educación kamachiyta mushukyachinapak killka, Manuel Medina kamachi killkak chayachishka kamuka, Tawkapurakawsay Ishkay Shimipi Yachachiyta sinchiyachinapa mashkakun, Educación Minkarishka ukupimi allichishka kanka..
Derecho al Trabajo y la Seguridad Social Minkarishkami Código de Trabajo kamachiytaka riksinkakuna, Salvador Quishpe, Cristian Yucailla, Peter Calo, José Chimbo, Joel Abad shinallatak Patricia Sánchez kamachi killkakkunami chayachirkakuna, kamachiyka llankachik-llankakwan kay mushuk pachakunapi llaktayukkuna kawsakushkawan paktarishpa llankanata achikyachinka; shinallatak, kay Código del Trabajo mushukyachinapak Rina Campain kamachi killkakmi kamuta chayachirka, llankaymanta llukshichishka mana paktarinchu nishpa yuyarishka killkawanka llankayman tikranata rikuchin shinallatak mana chaskikpi nakashpaka tikrana mana paktana rikurikpika yapachishka kullkita chayachinatami yanapan.
Ley de Sanidad Agropecuaria, Código de la Producción, Comercio Exterior e Inversiones; shinallatak Código Orgánico Integral Penal kamachiykunata mushukyachinapak Lucía Placencia kamachi killkak chayachishkawan, Ley Orgánica kamachiy rurana killkata ruranka, kay kamachiywanka, kichushka wakllirinalla murukuna ama chinkarichun shinallatak wakcha ayllukunaman chayachichunmi yanapanka, kamachiytaka Soberanía Alimentaria Minkarishkami allichinka.
Biodiversidad Minkarishkapimi Ley Orgánica para la Planificación Integral de la Circunscripción Territorial Amazónica kamachi mushukyachina killkata allichinkakuna, kay kamachiywanka markakunapak, kitillikunapak GAD tantanakuyman llankaykullkita rikuchik pankata shinallata Fondo Común de la Circunscripción Amazónica kullkipaktanatapashmi allichinkakuna. Allichinapak killkataka Isabel Enríquez kamachi killkak chayachirka.
Puchukaypika, COOTAD kamachi mushukyachina killkata, Lucía Placencia kamachi killkak chayachirka, Gobiernos Autónomos Minkarishkami allichinka. Kay kamachiywanka consejales pushana pachakuna, paykunapak ranti chaypikana pachakuna shinallatak warmi karipash paktakana, mana chikanyachina, katinakushpa warmi kari kanatami rikuranka.
PV/cg-kch
