Kay Covid-19 unkuy llakita chimpapuranamanta Mamallakta Tantanakuypi sinchita rimanakurka

Martes, 11 de enero del 2022 - 21:17 Imprimir Elaborado por: Sala de prensa
Proyecto para gestionar la emergencia sanitaria por Covid-19 generó amplio debate en el Pleno de la Asamblea Nacional

Kunan puncha Mamallakta Tantanakuypi Ley para la Gestión de Emergencia Sanitaria por Pandemia causada por el Covid-19 y sus variantes kamachi rurana killkata rimanakurka, kaypika pandemia unkuyta chimpapuranapak kamachiyta churanapak mashkakun shinallatak llaktapi pushakkuna kikin llankayta paktachichunmi achikyachinka.

Kay kamachiy killkata ruranaka Mamallakta Tantanakuy Hampimanta, yachaymanta, kawsaytarpuymanta, llakta allikawsaymanta shinallatak llakikuna chimpapuranamanta rikuna hatun yuyay ukupimi; Mamallakta Tantanakuyta pushak, Guadalupe Llori Abarca, nirkami "Mamallakta Tantanakuyka Ecuador llakta ayllukunata kawsaypi shinallatak hampinapi hayñita sumaychanapakmi kamachiyta rurakun".

Shuk niki rimanakuyka Derecho a la Salud Minkarishkapi allichishka killkapi rikushpami paktarirkakuna. Marcos Molina, Minkarishkata pushak, kay kamachiywanka unkuy hampinata yachakkuna, riksikkunami llaktapi hampinata pushakkunawan yuyaypaktarishpa ima ruranata arininkakuna, kay yuyarishka killkakunataka llaktapi kawsakkuna, suyu llaktapipash kawsak ayllukunapashmi tukuyta pakta katina kanka, nirka.

Shinallatak pandemia unkuyta achiklla pushaytapash mashkakuna, tukuy llaktayukkuna pakta willayman chayachun churashpa sumaychanka, kay willaypika llaktapi llankashkakuna, hampikuna rantishka, hampina hillaykunata paktarishkakunata riksichishpa, shinallatak vacuna hampita churashka iñik pankapata riksichishpa, shinami mana alli pakalla kay iñik pankata hapinata anchuchinka.

Kay kamachiy rurana killkamanta rimanakuypika tawka kamachi killkakkunami yuyaykunata chayachirka. Kamachi killkakkunaka pandemia unkuy pachakunapi shinallatak wakllirinalla rikurikpipash imashina kamaywan utka kutichina mutsurishkata rimarkakuna. Shinallatak mamakamachiytapash mana wakllichinapak rikurana nirkami, shina,  kawsana wasiman mana yaykuna kashkapi shinallatak wanachina kullkimantapash mana yuyaypaktarirkachu.

Chayachishka yuyaykunapika llaktapi yanapanapakka pandemia unkuyllata mana rikunachu kan nirkami, ashtawanpash kay kamachiyka tawka shuktak llakikunatapash chimpapuranapakmi yanapana kan nirkami; shinallatak llakikuna tiyakpi yanapanawan tinkirina; llaktapi unkuy llakikuna mirakpika shukllapak hampina wasikunapash yanapachunmi mañanka; wakllirinalla ayllukunapash yanapay llankaykunaman, hampikuna chaskinaman shinallatak unkuypi yanaparinamanpash chayachichun rikuranka. Ashtawanpash, kari warmi wawakuna, wamkrakuna minkashka wasipi kawsakukkpika yanapay ukllayta sinchiyachina shinallatak llaktakuna ukllanapak chikanyashpa yanapayta churana nirk .

20 kamachi killkakkuna rimarishka kipa, Mamallakta Tantanakuyta pushak shuk niki rimanakuyta wichkarka. Rikuchishka yuyaykunaka paktami riksishka kanka chay kipami Minkarishka ukupi llankaywilayta ishkay niki rimanakuypi kamachi killkakkuna riksichun allichishka kanka.

RSA/pv/cg-k

Av. 6 de Diciembre y Piedrahita · Teléfono: (593)2399 - 1000 | Quito · Ecuador