Guadalupe Llori Abarca Mamallakta Tantanakuyta pushak, Rafael Lucero (PK); Paola Cabezas (UNES); Esteban Torres (PSC); Juan Fernando Flores (BAN); shinallatak, Marlon Cadena (ID) llaktaywankuri pushakkunawanmi kay pachakuna Mamallakta Tantanakuy kamachiy ruraypi, ñawinchiypi, llaktay chaparaypi llankay paktashkata chimpapurarkakuna.
"Sinchitami ñawpakman purikunchik, Ecuador llaktayukkuna minkashka llankaypi yuyaypaktarishpa. Kay willka rurayta paktankapak, sumaychashpami taripana kanchik, maypi kanchik shinallatak mamallakta paktana churashkaman chayankapak alli purinata sumakta allichishpa", kashnami Guadalupe Llori, nirka.
Kay llankay rimanakuypika, Unidad de Técnica Legislativa (UTL) tantanakuymi Mamallakta Tantanakuypi kamachi ruraykuna imashinalla katikushkata riksichirka.
Kay pushay llankay sukta killakuna ukupika Ecuador llaktapak Minka llankay churashka 5 yuyaykunaman kimirishka kamachi rurana killkakuna allichipimi llankaypaktashka: Hampinapi, yachaypi, kawsaytarpuypi, llaktayuk kasiklla kawsaypi shinallatak llakikuna chimpapuranapipash; kullkillankaymanta, llankayta wiñachinamanta, llankay charinamanta, llankaypak hayñikunamanta shinallatak seguridad social yanapaymantapash; runakunapak kawsaymanta, wasi ayllumanta, kari warmi paktakanamantapash; pachamamamanta, runa ayllu llaktakunapak sapsi hayñikunamanta; shinallatak, allikaymanta, achiklla llankaymanta, llaktayuk chaparaymanta, shinallatak llakikunata chimpapuranamantapashmi llankakunkuna.
Ashtawanpash, Minkarishkapi llankashka, paktashkatami riksirkakuna, shinallatak Mamallakta Tantanakuy llankanapak churashka ñanta katikushkatapash rimanakurkakuna.
Ashtawanka, Minka llankanapak churashka kamachiykuna arinishka Registro Oficial kamaypi willachishkata hatunyachirkakuna: Ley de Creación de la Universidad Intercultural de las Nacionalidades y Pueblos Indígenas, Amawtay Wasi; Ley Orgánica para la Reactivación Económica de las Provincias de Esmeraldas y Manabí; Ley Orgánica de Emprendimiento e Innovación para la Implementación Efectiva del Emprendimiento Juvenil; shinallatak, Ley Orgánica Reformatoria del Código Orgánico del Ambiente y del Código Orgánico de Organización Territorial, Autonomía y Descentralización kamachiykunatami allichishpa arinishkakuna.
Ashtawan kay Ley Orgánica de Vivienda de Interés Social kamachi rurana killkata Mamallakta Tantanakuy arinishkata rimanakurka, shinallatak Llakta pushakman arinichun allichinaman kachachunpash chayachishka kan.
Guadalupe Llori pushak, tukuy kamachi killkakkunatami kikin wankurikunapi pakta llankanapak arinishkata katichun kayachirka, shinallami "Ecuador llakta Minkapi" paktanapak churashkaman chayashun nirkami.
JLVN/pv/cg-k
