Mamallakta Tantanakuy shukniki rimanakuypi Ley Reformatoria a la Ley de Compañías para la Optimización, Impulso Empresarial y para el Fomento del Gobierno Corporativo kamachi rurana killkata riksirkakuna, kay rimanakuyka Desarrollo Económico Minkarishkapimi allichishka karka.
"Llankayta sinchiyachinapakmi ñawpakman katikunchik, Mamallakta Tantanakuyka Ecuador llaktapak llankaywasikunatmai sinchiyachinata mashkakun; chaymantami, llankaywasikunata mushukyachinapak, llankanapak kullkita chayachikkunapak hayñita ukllanatami kay kamachiyka mushukyachinka", kashnami, Guadalupe Llori Abarca, Mamallakta Tantanakuyta pushak nirka.
Kay kamachiyka kunan pachakuna Ecuador llakta tantanakushpa llankaykunapi rikuk kamayta mushukyachinatami mashkakun, kay llaktapi llankaywasikuna wiñarinapak rikuykunata alli paktankapak, utkachinkapakpashmi mashkakun shinallatak Ecuador llaktapi llankanapak kullkichurakkunapak hayñita ukllankapak, ashtawankarin kullkita pakta chayachikkunata rikunkapak.
Wilma Andrade kamachi killkak, Desarrollo Económico Minkarishkata kipapushak, killkata riksichikpash, kay kamachi rurana killkapika chayachishka chusku kamukunatami tantachishkanchik shinami istallaktakunawan paktarik llankaywasikunata wiñachishun, tantarishpa pushayta sinchiyachinapak shinallatak llaktamanta istallaktamantapash llankaykullkita chayachinapak yanapanka.
Rimanakuy
Nathalie Arias kamachi killkakka Ecuador llaktapi 90% llankaywasikuna wasi ayllupura kallarishkami, chaymantami tantanakushpa pushayta rikuk kamachiyta rurana ancha mutsurin. Francisco Jiménez runaka llankayta ashtawan allikallarichinapakmi yanapan nirka, Ecuador llaktapi llankakkunata chaparanapak kamachiyta churan. Nathalie Viteri nirkami, kamachi rurana killkapika tawka llakikunami rikurin ashtawan sinchiytami riksina kan; yachakkunami riksishpa yuyaykunata chayachina kan, nirka.
BG/pv/cg-k
