Kay inti punchami, Mamallakta Tantanakuyka shuk niki rimanakuypi Ley Orgánica para Atracción de Inversiones, Fortalecimiento del Mercado de Valores y Transformación Digital kamachi rurana killkata allichirka, kullkillankaymanta utkashpa ruranapak chayachishkami kan.
"Mamakamachiypi, kamachiykunapi rikuchishkamantami, Mamallakta Tantanakuyka shuk niki rimanakuypimi Llakta pushak llankaypak kullki chayachik kamachiyta utkashpa ruranapak chayachishka killkata allichirkanchik. Kullkillankayta sinchiyachinapi, llankay wiñachinapi yanapaytami riksikunchik; shinallatak, Ecuador llakta ayllukunata yanapanapak imalla allichina kashkatapashmi rikukunchik", kashnami, Guadalupe Llori Abarca, pushakka nirka.
Kay Desarrollo Económico Minkarishkata pushak, Daniel Noboa kamachi killkakka, kay kamachiywanka llaktapak kullkillankayman kullkita chayachinapakmi pakta yanapan nirkami. Ashtawan nirkapashmi, Kutinpashmi Ecuador llakta waranka waranka ayllukunapakmi llankayta wiñachin shinallatak mushuk kullki chayachikpakka manu kullki chayachinatami kishpichin. "Antanikichik mushukyachinata sinchiyachinapakka mushuk antakunatami chayachina kan shinallatak llankaypushaytapash utkachinami kanchin; zonas francas suyukunata, chani mintalaytapash sinchiyachinapakmi", nirkami.
Kay Minkarishkapi llankak kamachi killkakkunaka kay zonas francas suyukunapak saywata, wichkayta churanami illan, chaymantami paktanata mana chinkashpa tukuyta mushukyachina mutsurin nirkami. Shinallatak kay kamachiy rurana killkapika llaktapak charishkata shukllaman churanapak harkaytapash kimichishkanchik; chaymantami yachaypi, hampinapi, kasiklla kawsanapi, kamaypi yanapayka mana kullkita mañashpa chayanata rikuchin, shinallatak chikanyachinatapash saywan, nirkakunami.
Rimanakuypika kamachi killkakkunaka llaktapak shukllapak wankurishka saywanata, wichkay churanatami kutinpash rikuchun mañan. Llankaykullkita apamunapakka pakta kamay charina, achinklla yupaykuna, alli paktarinakunata charinami mutsurin nirkakunami. Kay kamachiy rurana killkawanka llaktay yanapashka killkarinakunapash tukuy antanikichikpi kachunmi mañan, shinallatak mintalay shutichiykunata, chimpanchikunatapash llikapankapi paktarichunmi churan, shinallatak llaktapak - shukllapak wankuriytapash ashalla paktanakunawan, achiklla ruraykunawan alliyachin. Kay kamachiyka Ecuador llaktapi llankayta mirachinapimi yanapak, nirkakunami.
Tawka yuyaykunapika, chani mintalay sinchiyachunka kullkillankayta, chaparayta, yachak runakunawan rikuraytami tukuy paktanapak yachachina mutsurin shinallatak kullkiwan kawsaytapash sinchiyachinami kanchik nirkami. Ashtawanpash kay kamachiy rurana killkapika shukllapak llankaywasikunami llaktapak llankawasikunapak hawapi kan shinallatak zonas francas suyukunapash Llakta Winarinapak Rikuchik pankapi mana kimirishkachu, nirkami.
Mamallakta Tantanakuyta pushak, Guadalupe Llori Abarca, 24 kamachi killkakuna rimarishka kipami, kay shukniki rimanakuyta wichkarka. Desarrollo Económico Minkarishkami ishkayniki rimanakuypak llankaywillayta yuyaykuna tantachishkata allichinka.
JLVN/pv/cg-k
Ashtawan shuyukuna:
