"Llaktayuk chaypikachun llankakushpaka, mana anchurinichu. Llakta ayllukunapak hayñimanta, ñuka yuyashkamanta atirik warmimi kani. Mamallakta Tantanakuyta pushakushpaka kay Ley Orgánica de la Función Legislativa (LOFL) kamachi rikuchishkatami paktachishkani. Ñuka paktanata ruranapashmi katishkani, kamachi ruranapi shinallatak ñawinchinapipash llankashpa, puncha llankanapak churashkata katinapi, Mamallakta Tantanakuypak rimanakuyta, kay Consejo de Administración Legislativa (CAL) wankuri rimanakuyta pushanatami paktachishkani", Kashnami Guadalupe Llori Abarca, Mamallakta Tantanakuyta pushak, Teleamazonas karurikuchikwan rimanakuypi nirka.
Kamachi Awllipi kay punchakuna rikurishkamantaka, Guadalupe Loori kamachi killkakka llankay kallarimantami, Ecuador llaktaman ishkay yuyayta riksichirkani nishpa yuyachin: "Mamakamachiyta, Kamachi Awllipi llankanata rikuchik kamayta; shinallatak, tukuykuna makipiranapak llankanata, llaktapi wankurinata, pushay paktanata shinallatak llankaywasita sumaychanatapashmi paktachichikuni".
Ashtawanka, taripay tiyanata mana harkanichu, pushaypi sakirinatapash mana mashkakunichu, ashtawanka Ecuador llakta alliman chayachunmi tukuy wankurikuna yuyaypaktarina mutsurin. "Tukuy wankurikunata, kamachi killkakkuna llakta allichinapak munay charikkunatapash utkashpa llakikunata allichinapak, ama harkarinapakmi kayachini, llaktapak mutsurishka kamachiy rurana killakunatapash llankashpa katinapak", nirkami.
Guadalupe Llori kamachi killkak, "Mamallakta Tantanakuypak llankayta harkakkunaka rimanakuyman chawpiyalli mana chayamukkunami, tawkapura wankurimanta shuk minkarishkata wiñachinapak mashkakkuna, taripayta kallarinapak rikuchishkata mana katikkuna". Kay LOFL kamachiypika, mutsurishka kimsa rikuchishkatami paktana kan: CAL wankuriman shuk huchachiyta chayachina; kipaka riksik wankuriman chayachina, kutinka ad hoc nakashpaka Multipartidista minkarishkaman chayachina; shinallatak, puchukaypika, Mamallakta Tantanakuymi shuk kamak tantarishka kashkamanta yuyaypaktarinka.
Huchachishka mana tiyakpika, riksik wankuriman mana chayachishpaka, pakta kamay katinatami wakllichikun, mana ruranaman yaykurishkamantaka wanachiymi tiyan, shinami Procurador General del Estado kamak willashkapi tiyakun, Mamallakta Tantanakuyka CAL wankuripak llankaypi mana yayakuri ushanchu ninmi, kashna willaywanmi rimanakuyta puchukarka.
EG/pv/cg-k
