Mamallakta Tantanakuymi Derecho a la Salud Minkarishkapi allichishka llankaywillayta riksishpa kallarirkakuna, kay taripaypika llaktapak llankakkuna ancha unkushkakunapak, mana riksishka unkuy charikkunapak hampikunata mana pakta tantachishkatami taripashka kan; ashtwanka kay taripaypika hampina wasikuna imashinalla llankakushkata shinallatak kay Sistema Nacional de Salud hatun paktarinapi hampikuna tiyashkata riksinkapak tariparkakuna. Llankaywillaypika maykama taripay paktashkata, imallata taripashkata ima pachakunapi riksishkata; maykama taripakushkata; mayhanlla yachakkuna yanapakushkata; llaktayukwan rimanakushkata shinallatak imalla willaykuna mañashkatapashmi riksirkakuna. Taripakkunaka mamallaktapak hampina wasikunaman chayashpami riksinaman rirkakuna, tukuy willayta tantachishka kipami imalla rikurishkata, ruranakuna riksirishkatapash willankakuna.
Mamallakta Tantanakuyka Llakta pushak rimarishkatami riksirkakuna
Llakta pushak kay yallik 24 puncha pawkar killa Mamallakta Tantanakuyta shitarishpa rimashkatami riksishpa shuk yuyarinakushka killkata allichirkakuna. Kay rimanakuypillatakmi, Comité de Ética minkarishkaman shuk huchachiyta chayachichun mañarkakuna, kay huchachiypika Ley para la Atracción de Inversiones, Fortalecimiento del Mercado de Valores y Transformación Digital kamachi arininapak mayhanlla kamachi killkakkuna imalla mañashkata riksichichun rikuchichunpashmi kayachinkuna. Shinallatak llaktayuktapash kay Comité de Ética minkarishkaman ima llakikuna kay 2021-2025 watakuna llankaypi tiyashkata riksishpaka willachichunmi kayachin, kay willaykunata tantachishpa ñawinchiyta kallarinkapak, ninmi.
Ley de Economía Violeta kamachiy rurana killka Mamallakta Tantanakuypi rimanakuyman yaykurka
Mamallakta Tantanakuypi kay Ley para Impulsar la Economía Violeta kamachiy rurana killkata riksishpa kallarirkakuna, kay kamachiywanka warmikuna pakta llankayman chayachunmi llaktaykunata wiñachishpa tukuy llaktayukkunapurapi warmikunapak kullkillankayta sinchiyachichun rikuranka, shinami kimirichishpa kullkillankaypi, llaktayukkunapipash wiñayta paktachun yanapanka, kayshina pakta pakta alli kawsayta yanapaykunatapash charinapakmi rikunka. Kay yuyaykunamantami, Nua Fuentes runaka yuyaykunata chayachirka, payka Proyecto Transgénero tantanakuymantami, LGBTIQ wankuripi kimirishka ayllukuna tukuy llaktapi llakikunawan kawsakushkatami riksichirka.
Kay 19 puncha kulla killatami Ecuador llakta Yakukishpichikpak puncha nishpa shutichirka
Mamallakta Tantanakuypimi, kay 19 puncha kulla killata Día del Guardavida Ecuatoriano nishpa shutichirka, kayshina riksirishkawanka tukuy yanapak runakunapak llankaytami sikrishpa sumaychan. Kay yuyarinakushka killkapika, Mamallakta Tantanakuymi Ecuador yunka llaktapi kay runakuna paykunapak kawsay wakllirinalla kakpipash mamakuchapi armakuk ayllukunata ima llakita charikpi utkashpa yanapanapak kayachin, paykunaka llaktayukkuna Ecuador llaktapak mamakuchapi samanaman llakta riksinamanpash chayakkunata chaparashpa yanapachunmi kayachin. Shinallatak tukuy llaktapi pushakkunatami kishpichishpa llankakkunapak hayñikunata riksinaman, yanapak kamachiyta ruranamanpash kayachin.
Kay Ministro del Interior llankaywasita pushakka llakikuna imashinalla kashkamantaka killan killanmi riksichinka
Mamallakta Tantanakuypimi Ministro del Interior llankaywasi pushakta kay Soberanía, Integración y Seguridad Integral Minkarishkaman kay Plan Nacional de Seguridad Ciudadana y Convivencia Social Pacífica llankaypaktay purikushkata shuk llankaywillaypi riksichichun yuyarirkakuna. Kay yuyarinakushka killkapika ninmi, kimsa killan killanmi Minkarishkamanka llaktayuk kasiklla kawsanapak mashna kullkiwan llankakushkata, imashinalla paktarikushkatapash riksichinka. Ashtawanka, Mamallakta Tantanakuy yuyarinakushkapika kay llaktapi llakikuna kawsayka Llakta kawsayta llakichiymi kan nirkami, shinallatak tukuy llankaywasikunami llaktayuk kasiklla kawsanata rikunapika mamakamachiy rikuchishkata katishpa llankana paktan, nirkami.
Mamallakta Tantanakuyka Ñuñuta tarpuna Mintalanapakpash kamachiyta riksirkakuna
Kay Ley para Fomentar la Producción, Comercialización, Industrialización, Consumo y Fijación del Precio de la Leche y sus Derivados kamachiy rurana killkata kutinmi Soberanía Alimentaria Minkarishkaman tikrachinapak yuyarirkakuna, kay minkarishkapimi Mamallakta Tantanakuypi ishkayniki rimanakuypi tantachishka yuyaykunata allichinkakuna. Minkarishkata pushak, Mariano Curicama kamachi killkakka, Ley Orgánica de la Función Legislativa (LOFL) kamachiypak 61 niki killkapi kimirishpami, Mamallakta Tantanakuy pushak, Guadalupe Llori, kamachi killkakta tukuy tantachishka yuyaykunata allichinkapak puncha llankayta harkachichun mañarka.
Usura llakita, llaktayukta ukllanata shinallatak llaktayuk chayana mitsanatami Minkarishkakunaka llankarka
Kay Justicia Minkarishkapika kay Usura llakita shinallatak Sistema de Protección y Promoción Social llankay rikunapak tawka kamachiy mushukyachina killkatami riksishpa kallarirkakuna; chaypakka tawka ayllukunapak yuyaykunatami chaskirka.
Kay Derecho a la Salud Minkarishkapika Consejo de Administración Legislativa (CAL) wankurishkaman kay Ley para la Gestión de la Emergencia Sanitaria por Pandemia kamachi rurana killkata chayachinapak yuyarirkakuna, kaypika Ley de Gestión de Riesgo kamachiy rurana killkawan tantachinkapakmi llankakun, kay killkataka Seguridad Integral Minkarishkapimi riksishpa allichikunkuna.
Kay Gobiernos Autónomos Minkarishkapika Código de Organización Territorial, Autonomía y Descentralización (COOTAD) kamachi mushukyachinapak chayachishka pichka kamu killkakunatami riksishpa kallarirkakuna, kaypika llaktayukkuna chaypikanata, pushaykunapi kari warmi pakta paktakanata shinallatak llaktakunapi llankaykuna katichunpashmi mashkakun.
Mamallakta Tantankuypak llankaypika yanapash llankaymi alli kan
Kay Código Orgánico Integral Penal kamachiy mushukyachina killkapika Anatocismo llakitami kimichirka mushuk llakitashina, kay yuyaymanta riksinapakka Justicia Minkarishkamanmi Defensoría del Pueblo shinallatak Fiscalía General del Estado pushakkuna chayamurka.
Kay Derecho al Trabajo Minkarishkapika 12 uchilla wankurikunatami wiñachinka, kaymanka Ministerio de Trabajo pushak, IESS pushak, Yachaywasikuna, Unidad Técnica Legislativa wankuriy, yachachikkuna shinallatak Llankay hayñimanta riksikkunami kimirinka.
Kay Transparencia Minkarishkamanka Ley de Participación Ciudadana para la Gestión Democrática de los Presupuestos Participativos kamachiy mushukyachina killkapak yuyaykuna riksichinamanka llaktayukkunami chayamurka.
Minkarishkakunapika Llaktay chaparayka punchantami
Kay Régimen Económico Minkarishkapika kay Banco Pacífico kullki wasipak, paywan llankak wasikunapakpash kawsay, ñawpa riksishka shinallatak kamaykunapash imashinalla kashkata riksichik llankaywillaytami arinirkakuna, Mamallakta Tantanakuypi yuyaypaktarishkata katishpa llankarkakuna, kay killkapika kullkiwasi imashinalla llankakushkata kutin kutinpash katirachunmi mañan.
Kay pachamamapi sakirishkata, chuki llukshichinata, punkara rupakuy anchuchinata, mapa yaku kuchakunawan Drago 22 kuska Shushufindi llaktapi mapayachishkata taripay ukupi, shinallatak Declaratoria de Interés Nacional llankaywillayta suktan killan killan chayachina llankaywillaypi kimirishpami, Biodiversidad Minkarishkawan Antisuyu llaktaman chayashpa rikunapak yuyarirkakuna. Kayshina yuyaypaktarinapakka Minas, Hidrocarburos llankaywasi kipashakta shinallatak Petroecuador pushaktapashmi kallaripika uyarka.
Soberanía y Seguridad Integral Minkarishka Santa Elena markanama chayarkakuna kaypimi mamakuchaman yaykuna pampapi shinallatak mamakucha ukumanpash llakikuna tiyashkata rimanakurkakuna, shinallatak imashina llankaykunawan kallarinatapash yuyarirkakuna, chaypakka chalwa hapikkunawan, llaktayukkunawanpash rimanakurka.
Minkarishkakunaka llankay killakullki chikanyashkata, manu kullki mushukyachinata, shinallatak watayuk kashkatamanta rakishkatapash rimanakurka
Kay Derecho al Trabajo y la Seguridad Social Minkarishkapika Ley para la Igualdad Salarial entre Mujeres y Hombres kamachiy rurana killkamanta shukniki rimanakuypak llankaywillaytami arinirkakuna, kay kamachiyka shuk llankaypi kari warmipash chayllatatak rurashkamanta llankay killakullkita pakta pakta chaskinapakmi yanapanka. Shinallatak llankaypi mashna watayuk kashkata rikurashpalla llankayman kayachinatapash yachashpa katikun.
Kay Desarrollo Económico Minkarishkapika mamakamachiyta riksik tawka yachakkunatami chaskirka, paykunaka Ley Derogatoria del Decreto – Ley Orgánica para el Desarrollo Económico y Sostenibilidad Fiscal tras la Pandemia COVID-19 kamachiy rurana killkapak yuyaykunatami chayachirkakuna. Chaypakka Ana Gómez, Emilio Suárez, Ismael Quintana shinallatak André Benavides yachak runakunaka Mamallakta Tantanakuymi kay kamachiyta anchichunapak ushayta charin nirkakunami.
Kay Desarrollo Económico shinallatak Relaciones Internacionales Minkarishkata pushakkunaka istallakta ayllukuna purinakuy rimanakuyman chayarkakuna
Kay Desarrollo Económico minkarishkata pushak, Daniel Noboa, shinallatak Relaciones Internacionales minkarishkata pushak, Juan Fernando Flores kamachi killkakkunami, Ecuador llaktapak shutipi Foro de Examen de la Migración Internacional shukniki hatun rimanakuyman, Naciones Unidas tantanakuy Nueva York llaktaman, kay 17 - 20 punchakuna aymuray killa 2022 watapi chayarkakuna. Kay Naciones Unidad Tantanakuyman wankurishka llaktakuna, 2018 watami, kikin llaktakunapi, suyu llaktakunapi, tukuy allpapachapipash istallaktamanta purik ayllukunata yanapanapak shuk Pacto Mundial para la Migración Ordenada, Segura y Regular yuyarinakushka killkata arinirka, kaytami imashinalla llankaypi paktashkata riksinapak yuyarirkakuna. Noboa kamachi killkakka llaktapi ayllukuna purinapak yanapak kamachiy tiyashkatami riksichirka, kay puchukay watakunaka Ecuador llaktaka istallakta achka ayllukuna chayamushkatami yanaparkanchik nin, shinallatak Flores kamachi killkakka runa ayllukunata wakllichiyta harkanapak yanapay tiyanatami kutinpash kayachin, kayshina istallakta ayllukuna purikta ama wakllichichun nirkami.
Mamallakta Tantanakuypak hatun llankayka kari warmi wawakunata ukllanami kallaripi kan
Kay Protección de la Niñez Minkarishkapika Código Orgánico de Protección Integral a Niñas, Niños y Adolescentes (Copinna) kamachiy rurana killkatami riksishpa katikunkuna, ashtawankarin Libro I kamupak 143 niki killkakunata riksirkakuna. Riksishka shuk yuyayka kitipi GAD pushakkunaman, paykunapak llakta ukupi, 15 watayuk ayllukuna llankachun arinik killkata chayachinapak ushay paktarinatami rikurkakuna, kay llankaykunaka mana wakllichik, llakichinmi kana kan, shinallatak kamachiywan waktarikukpash mana kana kanchu.
Kay Libro I kamu Copinna kamachiypika chichukunata, wachanatapashmi hayñikunawan ukllan, shinallatak Llaktami kay Sistema Nacional de Salud yanapaywan alli, kuyaywan, utkashpa rikunata charin ninmi, istallaktawan yuyarinakushka killkata rikurashpa shinallatak kay runakay wachana hayñitapash paktarishpami yanapana ninmi.
Shuktakpika, minkarishkakuna Ministro del Interior llankaywasi pushaktami uyarkakuna, payka kari warmi wawakuna, imillakunata llakichishkamanta imalla llankay paktashkata riksichirka ashtawankarin Ecuador llaktapi llakikunata chimpapuraypi llankakushkta willarka.
Kay hunkayllatakmi Jefe del Servicio Endocrinología del Hospital de los Ceibos-IESS hampina wasi pushakpash chayamurka, payka munashkamanta kari warmi kanamantami rimarka, shinallatak aycha ukunmanta kari wari paktarinatapash riksichirka, kay willaykunaka Código Orgánico de Protección Integral a Niñas, Niños y Adolescentes (Copinna) kamachiy killka rurana ukupimi paktarika.
Kamachi ruranapak ishkay kamu killkami Mamallakta Tantanakuypi riksinapak ña tiyan
Kay Ley que Regula el Uso Legítimo de la Fuerza kamachiy rurana killka ñami Mamallakta Tantanakuy riksinapak tiyan, Soberanía y Seguridad Integral Minkarishkapi ishkayniki rimanakuypak llankay willayta arinishka kipa. Kay kamachiywanka hayñikunata ukllankapak, llaktayukkunapak kacharishka kawsayta riksinkapak, shinallatak llaktayukkunapak kawsayta chaparanapakmi Llaktamanta pakta pakta ushaywan chayanka sinchita chimpapurankapash nimi. Chaypakka Llaktamantami Policia Nacional tantanakuy, Fuerzas Armadas tantanakuy shinallatak Seguridad y Vigilancia Penitenciaria wankuripash mamakamachiy rikuchishkata katirashpa llankanka, paykunaka kacharishka kawsana hayñikunata, llaktayukpak kawsaytapash sumaychanka.
Kunanka, Soberanía Alimentaria Minkarishkapika Ley para Fomentar la Producción, Industrialización Comercialización, Consumo y Fijación del Precio de la Leche y sus Derivados kamachiy rurana killkapak puchukay killkatami arirnirkakuna, ishkayniki rimanakuy puchukashka kipami allichirkakuna. Kay kamachiywanka uchilla maltalla ñuñuta tarpushka kawsakkunapak llakikunatami allichinapak yanapan, kaypika hunu chawpi ayllukunami llankashpa kawsankuna; shinallatak, ñuñumanta ruraykunata chaparanapak, sinchiyachinapak, kuyuchinapak, shinallata mirachinapak hayñikunatami churanata mashkakun.
PV/cg-k
