Mamallakta Tantanakuypi, kay 780 niki rimanakuy ukupimi Ley Orgánica de Incentivos a la Pesca Artesanal kamachiy rurana killkata shuk niki rimanakuypimi riksirkakuna, tawka kamachiykunatami chalwata makiwan hapishpa llankakta shinchiyachinapakka mushukyachinka, ashtawankarin llankanapak kullkita utkashpa mañachinapak, chalwata hapishpa llankakkuna llakipi kawsakukta yanapanapakmi.
Joao Acuña kamachi killkak, kay Soberanía Alimentaria y Desarrollo del Sector Agropecuario y Pesquero Minkarishkapi allichishka llankaywillayta riksichik, kay kamachiy rurana killkapika tawka kamachiykunata mushukyachinapakmi rikuchin, kay Código Monetario y Financiero; la Ley de Fomento a la Pesca; y la Ley de Acuicultura y Pesca kamachiykunata, shinami chalwata makiwan hapishpa llankakkunata llankanapak kullki mañachinapi, kullki kutichinapak pachakunata mirachinapi, wawakullkitapash ashayachishpimi yanapan.
Kay kamachiy ruranapakka makiwan hapishpa llankakunapak, kayshina llankaymanta tantarishkunapak, llaktapak llankaywasikunapak yuyaykunatami chaskishkanchik nirkami.
Kamachiywanka chalwata hapishpa llankakpak shinallatak mamakuchapi llankakpak kullkita mañachinapak willaykunatami allichin, mikuna sumaychayta paktanapak llaktayta alli paktachinapak sinchiyachinapak, ashtawanka chalwata makiwan hapishpa llankakkunapakmi yanapayta chayachin, shinallatak kay kamachiyka ñawpamanka yakupi kawsaytami ukllan, tiyashkata yallitak ama llukshichinata rikuran, kayshinami chawla hapinata shinallatak pachamamapi kawsaytapash pakta pakta charinapak rikuranka.
Rimanakuypika, kamachi killkakkunaka chalwata makiwan hapishpa llankakkuna tawka llakikuna charishkatami riksichirkakuna, kay llakikunaka pandemia unkuymantami shamukun shinallatak kay puchukay pachakunaka ashtawan llaki mirashka. Nirkakunapashmi chalwata makiwan hapishpa llankakkunata yanapanapakka llaktami rikunata charin.
Shinallatak, chalwata hapishpa llankayka Galápagos markapika chikanyashka kamachiywanmi paktarinka, kay llaktapak mamakuchapika wakllirinalla kashkamanta kayshuk llaktakunapi llankaymanta chikanyashpami chayankakuna.
17 kamachi killkakkuna rimarishka kipami, Mamallakta Tantanakuyta pushak, Virgilio Saquicela Espinoza, rimanakuyta wichkarka, shinaka kamachiy rurana killka kamuka Minkarishkapi ishkayniki rimanakuypak kutin allichirinapak tikran, rimanakuyta harkachirka; shinallatak kaya 24 chashka puncha raymi killa, 11H00 pacha tutamanta kutin kallarinapak kayachirkapash.
EG/pv/cg-k
