Awkarik 5 puncha sitwa killa 2022 wata, 10H00 saylla tutamantami, Mamallakta Tantanakuyman Ximena Garzón, ministra de Salud pushak; Consejo Directivo tantanakuyta pushak, rimarikkuna shinallatak Instituto Ecuatoriano de Seguridad Social (IESS) tantanakuyta hatun pushakkuna, Servicio Nacional de Contratación Pública tantanakuyta pushak, Contralor General del Estado shinallatak Ministro de Finanzas llankaywasita pushakkunapash chayamunkakuna. Paykunaka llaktapi hampina wasikuna llakipi paktarikushkata, shinallatak llankay pushaypi wakllirishkata shinallatak hampina wasikuna pushay llaki kashkatami riksichinkakuna.
Rimanakunapak yuyaykunaka kaykunami, Mamallakta Tantanakuyka tisiku ayllukunata, ancha unkuy charikkunata, shinallatak wakllichik unkushkakunapak hampikuna imamanata illashkata willachunmi mañashka; hampinapak mutsurishkata, hampikuna rantinata, shinallatak llaktapak hampi wakichina wasikunapi hampikuna Sistema Nacional de Contratación Pública tantanakuy ukupi illashkata; ashtawanka IESS, MSP llaktapak hampina wasikunamanta kulla killa 2021 watamanta aymuray killa 2022 watakama hampina yachakkunata llukshichishkamantapash willaytami mañashka.
Llaktapak llankaywasi pushakkuna ñawirinaka Mamallakta Tantanakuy 2 puncha raymi killa 2022 watapi yuyarinakushka killka paktashkami, kaypimi llaktapi hampinakuna ancha llakipi kawsakun nishpa riksichirkakuna.
Shuktakpika, Kamachik killkakkunaka Ley de Legalización de la Tenencia de Tierras a favor de los Moradores y Posesionarios de Predios que se encuentren en circunscripción de los cantones Guayaquil y Samborondón kamachiy mushukyachina killaktami riksinkakuna, kay kamachiywanka Guayaquil llaktapi kawsak achka ayllukunata mamakamachiypi rikuchishkata paktashpa wasi charichunmi yanapanka, kay kuskapika 150 waranka yalli ayllukunami kawsan shinallatak kaypi kawsakkunaka ancha wacha ayllukunami kan.
Ashtawanka, kay Ley para la Igualdad Salarial entre Mujeres y Hombres kamachi rurana killkatami shukniki rimanakuypi riksinkakuna, kay kamachiywanka llankaypi chikanyachishpa wakllichiytami ashayachinka shinallatak tukuy llankaykunapi kullkitapash chayshinallatak llankaymanta pakta pakta chaskichunmi rikuranka.
BG/pv/cg-k
