Mamallakta Tantanakuyta pushak, Virgilio Saquicela Espinoza, kay 11 puncha sitwa killa, 09H30 saylla tutamantapakmi, 15 minkarishkakunapak pushakkunata shuk rimanakuyman kayachirka, kaypika kamachiy rurana killkakunapak llankaywillay killka shukniki, ishkayniki rimanakuypak imashinalla ñawpakushkata riksinapakmi kan, kay willaykunata pakta riksishpami kay 2022-2023 wata llankanapak killkañanta allichinkakuna.
Ñawpamanka, kay chaska, 8 puncha, Mamallakta Tantanakuyta pushakka Consejo de Administración Legislativa wankuri kamachi killkakkunawan shinallatak UNES wankuri pushak, Marcela Holguín; kay Izquierda Democrática, Marlon Cadena; Pachakutik, Salvador Quishpe; shinallatak BAN, Juan Fernando Flores kamachi killkakkunawanmi rimanakurka, paykunaka kay mushuk pachakunapi llankanapak ruraykuna paktanamanta mushuk yuyaykunata chayachirka.
Virgilio Saquicela kamachi killkakka kamachiy rurana killkakuna harkachishka tiyakukta kutkashpa llankay kallarinapak ruraykuna paktanamantami rimarka shinallatak llakta kawsanapak anchami mutsurin nirkami, shinami llaktakuna wiñarinapi, llankay wiñachinapi, kasiklla kawsanapi, hampinapi, yachaykunapi, shuktakkunapipash llaktayukkunata pakta yanapashun, nirkami.
Llakta pushakpak minkashkami kay llankay kallarinapakka chusku hatun yuyaykunami tiyan nishpa willachirka: 1. Runapak Kawsay hayñita ukllanapi; 2. Llaktapi llankaykuna kutin sinchiyanapi shinallatak llankay wiñachinapipash; 3. Llakta wiñarinapi, Hampinapi, Yachaypi shinallatak Kawsay tarpuypipash; ashtawan 4. Ñawinchina shinallatak LLaktay Chaparanapipash.
Marcela Holguín, UNES wankurimanta kamachiy killkakka llaktayukkuna yanapanapak shuk llankayñan killkata allichina allimi kan nirkami, chaypakka chayachishka yuyaykunata mushukyachinapak tawka mushuk yuyaykunata chayachirka. Shinapash, llaktayukpak kullkillankayta allichinapak kamachiykuna, llaktayukpak kikin llankayta sinchiyachinapak, llankay kullkita pakta hapinapak, sumak yachaywasi kamachiyta mushukyachinapak kamachiy kunatami utkashpa rurana kanchik, nirkami. Kay yuyaykunamanta kamachiy rurana killkakkunaka ñami minkarishkakunapi allichirikun chaymantami llankashpa katina mutsurin, nirkami.
Shinallatak, Marlon Cadena, ID wankurimanta kamachi killkakka, llankanapak ñawpaman churashkata mashna paktashkata yachanapak 137 kamachi killkakkunatami taripana mutsurin nirkami. Chaypakka, chay yuyayllata charik kamachiykunata shukllapi tantachishpa riksinapak shuk minkarishkata wiñachina, kunanpika killkakunaka chikanyashkami, tawkamanta chayachishka, ninmi.
Shinallatak, Salvador Quishpe, Pachakutik wankurimanta, kamachi ruranapak yuyaykunata mushukyachinami mutsurin kaypimi kay yallik raymi killa atirinakuymanta Llakta pushakwan yuyaypaktarishka kamachiy rurana killkata kimichinapak nirkami. Shinaka, runa ayllu llaktakunapak sapsi hayñikunata; Ley de Comunas; shinallatak chuki llukshichina kamachiykunatapash utkashpa ruranapak mañan.
Puchukaypika, Juan Fernando Flores, kay Bancada del Acuerdo Nacional wankurimanta, Mamallakta Tantanakuypi rimarinapak ruraykuna chayachishkata Minkarishkakunata taripanapak mañan; shinaka kay punchamanta kallarishpa minkarishkakuna llankaywillay chayachinapak pachakuna mirachichun mañakpika nimamanta mana arinina kanchu nin; ashtawankarin, hunkaypi chayamushka ishkay kutin rimanakuchun yanapayta chayachina kan shinallatak, mutsurikpika, chaskapunchamanta intipunchakama llikapankapi, kayshina tukuy mañashkata pakta allichishpa katinapak, ninmi.
EG/pv/cg-k
Ashtawan Shuyukuna:
