Mamallakta Tantanakuyta pushak, Virgilio Saquicela Espinoza, kay shamuk kullka puncha, 09h30 saylla tutamantapakmi, No. 787 niki rimanakuyman kayachirka, kay rimanakuypimi Mamallakta Tantanakuypak shukniki, ishkayniki kipapushakkunata akllanka.
Pushakkuna akllanaka Ley Orgánica de la Función Legislativa kamachiypak 16 niki killka rikuchishkata paktashpami katinka:
"Kari nakashpaka warmi pushakpash ashalla pachata, wiñay pachapakpash illakpi nakashpaka pushaymanta anchurikpimi, katirashpa Shukniki shinallatak ishkayniki kipapushakkuna yaykunka.
Mamallakta Tantanakuyka pushakkuna illakpika akllanka, ishkay wata llankanapak kamachiy rikuchishka illashka pachakunata llamkanapak"
Chaypachallatak, Mamallakta Tantanakuyka Ley Orgánica del Sistema Nacional de Cualificaciones Profesionales kamachiy rurana killkata shukniki rimanakuypi riksinkakuna, Educación Minkarishkapi allichishka killkata katishpa.
Kay kamachiywanka, llamkayñan ruranata, hillaykunata, llamkak ayllukunata charinapak mashkakun shinallatak llamkayñan ruranapak, allichinapak, hillaykunata charinapak taripanapakpash rurakkunatami yachaypi yanapanapak mashkakun kayshina tarpukkuna, llamkakkuna, yachachikkunapash paykuna yachashkamanta riksishka kachunmi ayllukunata mashkakun.
Yachashkawan munashkata riksishka, paktarishka, allichinapak chayashkatapash yachaypi riksishkallamanta charishkatapash yachanapak mashkakun, taripashka paktarishka kipa, yachayta sinchiyachinapakpash.
Shuktak Yuyaykuna
Puncha llamkanapak churashkapika ashtawanka, kay 25 puncha sitwa killata watan watan Día Nacional de la Mujer Afroecuatoriana-Negra-Afrodescendiente puncha nishpa shutichinapak mañaymi tiyakun; shinallatak, kay 31 puncha sitwa killata Día Nacional de Administrador Público puncha nishpa shutichinapak mañaypashmi tiyakun.
PV/cg-k
