Mamallakta Tantanakuyta pushak, Virgilio Saquicela Espinoza, Guayaquil llaktapi willachikkunawan rimanakuypika, Guillermo Lasso Mendoza, Llakta pushakman, shuk killkata chayachirkani nirkami, kay killkapika Mamallakta Tantanakuy imallapi llamkanapak yuyaypaktarinapak shuk tawkayashka minkarishkata wiñachinapak kayachirka, Llakta pushakmanta shinallatak Mamallakta Tantanakuymantapash kimirichun, kayshina yuyaypaktarishpa llaktayukkuna mutsushka hayñikunata rikunapak rurashka kamachiyta ama tukuytak allichinaman kachachunpash, ninmi,
Mamallakta Tantanakuyka Puerto Principal kitipimi 478 watakuna Guayaquil llakta wiñarishka paktashkamanta llamkanka, unanchay chayachishka kipaka, Mamallakta Tantanakuypak hatun rimanakuymi tiyanka, shinallatak tawka minkarishkakunapashmi llamkankakuna.
Willachik antakunawan rimanakushpa, Virgilio Saquicela kamachi killkakka Ecuador Llaktayuk mutsushkapi llamkanapak shinallatak mañashkakunata kutichinapakka rimanakuy ñanllami tiyan ninmi. Chaymantami mamallakta pushkata shuk minkarishka wiñachinapak llamkakkunata shutichichun mañarka, Mamallakta Tantanakuymantaka tukuy wankurikunamanta kamachi killkakkunami chaypi kanka, kayshina llakta mutsushkapi llamkanapak kallari yuyaypaktariman chayankapak, nirkami.
Tukuy llaktayukwan yuyaypaktarinapak rikunakunami tiyana, kayshina, Ley Orgánica de Educación Superior kamachiy mushukyachina killka, wamrakuna sumak yachana wasiman kacharishka yaykunata sumaychanapakka shuk Decreto Ejecutivo kamachi killkalla mana pakta kanchu, Sumak yachana wasikuna mirachinapashmi mutsurin, ashtawan yachachikuna tiyana, wasikunapash illan. Shinaka, Kullkita chayachinami mutsurin, chaymantami kamachiyta allichishpa llamkakunchik shamuk punchakunami rimanakushun, nirkami.
Shinallatak, rikuchirkami, Ley de Carrera Sanitaria kamachiyta charinchik hampik yachakkunapak llamkayta sumaychan shinalaltak llamkaykullkipipash paktayachin; shinallatak, Ecuador llaktapi yachachikkunapak llamkaykullipash pakta kanami shuyakun, chaypakka Mamallaktami 600 hunu dólar kullkita chayachina kan, ninmi.
Riksinchikmi, Llakta pushakka llamkayta wiñachinata, ruraykuna sinchiyachina kamachiy ruranatami kallaripi churan, kayshina yuyaykunata paktanapakka wankurishkata pushakkunawan makipurashpa llamkana kanchik, yuyaypaktarishka killkakunata arininapa, nirkami.
Mamallakta Tantanakuypi achkayashkamanta rimashpa, Mamallakta Tantanakuyta pushakka mushuk kipapushakkunata, Consejo de Administración Legislativa (CAL) wankuripak shukniki rimarikta akllashka allimi kan nirkami, tawka wankurikunawan yuyaypaktarishpa akllarkanchik, Llakta pushakmantapash chaypi karka, mamallaktapak mutsurishkata kallaripi churashpa.
Kay 2022 - 2023 watakunapi Mamallakta Tantanakuy llamkanamantaka, paktarina llamkaykunaman chayanatami mashkakunchik, kay raymi killka atirinakuypi mañashkawan paktarichun. Kay mañaykunapika Mamallakta Tantanakuymi kay hayñikuna paktanapak llamkanata charin, shinami Ecuador llaktayuk mutsushkata kutichinka, nishpami puchukarka.
EG/pv/cg-k
