Mamallakta Tantanakuy, Virgilio Saquicela Espinoza pushakukwan, 10 puncha karway killa 1809 watamanta 113 watakuna atirinakushka paktashkamanta sumaycharka, kay atirinakuyka Abya Yala llakta kishpirinapak Shukniki Kaparinakuymi karka. Raymika Mamallaktapak wipala yaykushkawan kallarirka, kipaka Ecuador mamallatapak Hayllitatami kay Wasi ukuman chayamukkunaka takirkakuna.
Kipaka, Pabel Muñoz kamachi killkak, Pichincha markamanta, kay wiñaykawsayta yuyarishpa ancha mutsurinmi nirka, Ecaudor llakta shinallatak Abya Yala llaktakunapi kari warmi ayllukuna kishpirishpa kawsanapak kallarishkata yuyarina hatun punchami nirka, kay atirinakuypi kallarishpami pachakunapi wiñarishpa 24 puncha aymuray killa 1822 wataman chayarka, kay punchami Real Audiencia de Quito kishpiriy paktarka, kuna Ecuador llaktapi.
Kishpirinaman kayachik kaparilla mana karkachu, ashtawanpash Abya Yala llaktapi kawsakkunapak yuyaypi kishpirina mashkayta kallarichiymi; kay kishpirina mashkay atirinakuy ashalla riksirishka karka, kanchamanta shuktak ruraykunawan, kay Revolución Francesa, Estados Unidos llakta kishpiriy, Napoleón runa España llaktaman yaykuriykuna, Quito llaktapi atirinakuyka kaypi mutsushkata mañashpami paktarirka shinalaltak kay hatun yuyaytaka kishpirishka killkapimi shinallatak Junta Soberana tantanakuyta wiñachishpami kishpirina yuyayta paktachirkakuna.
Paymantaka, Mamallakta Tantanakuyta pushak, Virgilio Saquicela Espinoza, kay 10 puncha karway killataka kay Ecuador llaktapak shinallatak Abya Yala llaktapak kishpirinapak ñanktami wiñachirka nirkami, chaymantami ñukanchik kawsaypi wiñayta yuyarina puncha kan, kay “Primer Grito de la Independencia” atirinakuylla mana kanchu, ashtawanpash kishpirina yuyayta sinchiyachikmi, shinallatak ñukanchik llaktayuk ayllukunapi kishpirina yuyayta tarpuymi kan. Kay hatun yuyarina punchaka Ecuador llakta kishpirinapak ñantami kallarichirka shinallatak, mana pantashpa, Mamallaktapak, llaktapak hatun punchami kan, kayshina ruraykunawanmi ñukanchik llaktaka allpa pacha llaktakuna katinapak riksichirka.
Kutinpash nirkami kay “Primer Grito de la Independencia” punchaka Ecuador llaktapak kari warmi aylukunapak ukun hatun yuyaypimi kallarirka, kay punchakuna llakta pushakukkuna mana alli llankaymanta sakurishpa, kay tukuy Abya Yala suyu llaktapi España llakta ayllukuna mitmapachapi waklliriy rikurishkamanta, shinami Quito llakta mushuk ayllukuna Juan Pío Montúfar runata katishpa, Junta Soberana de Gobierno tantanakuyta wiñachinapak yuyarirkakuna, paykunami Conde Ruiz de Castilla, Real Audiencia de Quito llakta pushakukpak llamkaypak ranti yaykurkakuna, kay ruraykunaka sukta punchakuna kipami paktarika, llaktayukkunawan hatun rimanakuypi.
Sinchipiñarichik, kari warmi wawakunapak mikuna illaymanta, yaya mama llamkay illakmanta, wamrakuna yachay illakmanta, yuyaykkuna shitashka kawsakuymanta, wasikuna mana yanapay chaskishkamanta llakichishka kashakmantapash; nima pacha ama kunkaychu kayshina rimashkata "Manuela Cañizares warmi, sinchipiñarishpa, wasi punkupi shayarishpa, shunku munaywan, kayman chayamukkuna manarak yuyaypaktarish ama anchurichunka; Hatarishpa Manuela sinchita riman, alli kawsak, yuyaysapa, kishpiranata mashkak, kaparishpa nin: ¡Mancharishka runakuna! ¡yanakunapak wacharishka karikuna! ¿imata manchankichik? ¡anchurinapak pachakuna mana tiyanchu!.
"Ecuador llakta kari warmi ayllukuna chinkachinapak pachakuna mana tiyanchu, huñullamkak kamachi killkakkuna; 213 watakuna kipa harikaywan, chikanyashkawan, llakichiywan, kamay mana paktaywan, llamkay illaywan wichkashka kawsakunchik. Kay hatun llakikunata mishanapakka watashka llakikunata anchuchinami mutsurin. Chaymantami, makipirashpa llamkanaman kayachishkanchik, llaktayuk mutsushkapi yanapashpa llamkanapak, Mamallaktapak llamkaywasikuna, llakta pushakkuna, Mamallakta Tananakuypash makipurashpa llamkanapak, ñukanchik paktarinamanta llakta alli kawsayta paktanapak" kashnai Mamallakta Tantanakuyta pushak nirka.
EG/pv/cg-k
Ashtawan shuyukuna:
