Mamallakta Tantanakuyta pushak, Virgilio Saquicela Espinoza, Catamayo kitiman chayashpa, Armando Figueroa runa, kiti pushakwan rimanakuyta charirka, pushak runaka kay kitipi tawka ruraykuna paktarichun mañay killkakunata chayachichunmi mañarka, kay mañaykunapika Virgen de El Cisne apunchik wasi llaktaman pakta chayana ñan mañaypashmi tiyakun.
Ashinallatak, kay suyupi wayramanta ushayta paktariy ruraypak kullki chayachina, kay pachakama manarak chayashkachu.
Kay mañaykunata chaskishpa, Mamallakta Tantanakuyta pushak, Virgilio Saquicela nirkami, Mamallakta Tantanakuyka ruraykunatamana paktariy ushanchu, Mamakamachiyka llakta pushak, llamkaywasi pushakkunapash imashina llamkashkata ñawinchiy paktarinapakmi rikuchin, nirkami.
Chaymantami, Mamallakta Tantanakuymanta ñawinchiy llamkayta paktachinapak arinirka Catamayo kiti pushakkuna tukuy mañashka willaykunata tantachishpa chayachinapak, kay wayra ushaymanta kullki chayachina imashpa mana chayakushkata riksinapak, chaypakka Corporación Eléctrica del Ecuador (Celec EP), Ministerio de Finanzas llamkaywasikunapak willashkatami mutsurin, nirkami.
Virgilio Saquicela kamachi killkakka Mamallakta Tantanakuyka llakta allikachunmi llamkakun nishpa yuyachirka, Ecuador llaktapak mutsushka kamachiyta rurashpalla mana llamkakunchu, ashtawanpash, llaktay chaparaypi tukuy llaktapak llamkaywasikuna alli rurayta paktachunmi llamkakun, nirkami.
EG/pv/cg-k
