Mamallakta Tantanakuyta pushak, Virgilio Saquicela, kunan puncha Consejo de Seguridad Pública y del Estado (Cosepe) rimanakuyman chayarka, kaypika llaktapi llakikunata punchanta wiñarishkata chimpapuranapak llamkay paktanata rimanakurka.
Yuyarinkichikmi, Mamallakta Tantanakuyta pushakka yallik killami Llakta pushak, Guillermo Lasso runata, kay Cosepe tantanakuy rimanakuyman kayachichun mañarka, kaypika llaktapak llamkaywasipura, makipurashpa kay llakikunata chimpapuranapak rimanakuyta charinapak.
Virgilio Saquicela kay Cosepe tantanakuypak rimanakuypika llaktayuk pakta kawsayman makipuranamanmi kayachirka, chaypakka Policía tantanakuyman llamkaykullkita, yuyaysapa llamkayman chayachinapak kayachirka.
Shinallatak Mamallakta Tantanakuymanta llaktayukkuna kasiklla kawsanapak yanapak kamachiykunata rurashpa llamkakunchik nirka, chaymantami Ley del Uso Legítimo de la Fuerza shinallatak Ley de Personal y Disciplina de las Fuerzas Armadas kamachiykunata allichishkanchik, shinallatak Ecuador llaktapi kasiklla kawsanapak yanapak shuktak kamachiykunata allichinapakpash akllakunchik nirka.
Nirkapashmi shamuk awkarik punchapak wankuri pushakkunata rimanakuyman kayachishun nirka, kaypi llaktapi imashina paktarikushkata riksishun shinallatak Mamallakta Tantanakuypak rimanakuyman chayachishun, kaypi yuyarinakuy paktankapak, kayshina llaktapi llakikunata chimpapuranapak.
"Ayllukunapak hawapi llaktapi kasiklla kawsaymi mutsurin, Mamallakta Tantanakuypi llamkay kaypimi kan shinallatak kamachiyta allichishkanchik, llaktapak hatun yuyaykunami kan chaypakka Llaktapak llamkaywasikuna makipurashpa llamkanami kan, shinallatak, llakikunata chimpapuranapak llamkayta kallarina", kashnami Mamallakta Tantanakuyta pushakka nirka.
PV/cg-k
