Mamallakta Tantanakuypi, chaypikak 109 kamachi killkakkunami, kay Ley de Extinción de las Universidades y Escuelas Politécnicas suspendidas por el Consejo de Evaluación, Acreditación y Aseguramiento de la Calidad de la Educación Superior kamachiy mushukyachinapak killkata arinirkakuna.
Kay kamachiyka chinkarishka sumak yachanawasikuna kullki paktanta shinallatak kullki kutichinata charikkunata yanapanapak yuyaymi; sakirishkawanka llaktapak sumak yachana wasikunata sinchiyachina munay, imalla mutsushkata, llamkakushkata shinallatak mushuk antakuna paktarikushkata riksishpa pakta rakinapak; mushuk yachaykunata shinallatak imapachapi yachaykuna paktanata riksinkapak; shinallatak, sumak yachanawasikuna mirashpa shuktak suyupi llamkay kallarinatapash rikunka.
Manuel Medina kamachi killkak, Educación Minkarishkata pushak shinallatak llamkaywillayta riksichikka, kay kamachiy ruranapak mañayka sumak yachanawasikuna charishkata mana pakchishpa pushakushkata rikushkamantami wacharirka, charishkakunaka shuk Fideicomiso Mercantil wankuripimi. "Ruraypika achka paktanami tiyakun, charishkata katunapak, chayachikman kullkita kutichinapi shinallatak kay Fedeicomiso wankuri kimsa watawan tiyachun shinaka 2023 watakama", nirkami.
Nirkapashmi kay kutichina charishkata imashina mutsuy chayashkata rikurashpami paktarinka, kallaripika llamkakunaman, Instituto Ecuatoriano de Seguridad Social, Sistema de Rentas Internas, Consejo de Educación Superior shinallatak runakunamana tantanakuymanpash chanina charikkunaman.
Nirkampashmi kay kamachiyman Universidad Superior Politécnica Javeriana kimichinapak mañarka, 2017 watami decreto ejecutivo killkawan chinkachishka karka. "kay paktayka Fedeicomiso wankuri kallarishka kipami rukurirka, chaymantami kay kamachiypi kimichina mutsurin", nirkami.
Shinallatak, Consuelo Vega kamachi killkakka kay kamachiyta arinishkawanka shuktak yachaywasikunatami yanapanka kay Politécnica del Chimborazo yachana wasita shina, Morona Santiago markapi charishka wasita kutin charinapak, kayshina antisuyu llakta wamra ayllukunata yanapanapak.
Ramiro Frías runaka kay kamachiy ancha yanapay chayachina kashkata rimashka kipaka, "charishkata alli paktanapak hillaymi kan shinallatak kaywanka, yachaymanpash tukuy llaktayukkuna chayanatami yanapak, kaytami llakta ayllukunaka achkata mutsun".
Llaktayuk rimay
Byron Vaca, kay Escuela Superior Politécnica del Chimborazo (ESPOCH) sumak yachana wasita pushak, ñawirishpa, kay Morona Santiago, Orellana markakunapi shina yachanawasi chikanyashpa llamkay paktanapak yuyarishkata riksichirka.
Shinallatak kay Sumak yachanawasi kay kamachiypak 6 niki killkata mushukyachina munay charishkata riksichirka, kay Fideicomiso wankuripi tiyakuk charishkata sumak yachanawasikunaman karana paktachun, yachachiypi llamkakukpi shinallatak mutsurishkata paktakpipash, shinami kay ESPOCH mañay tiyakun, paykunaka 12 hunu dólar kullkitami Morona Santiago markapi yachana wasita allichinapi churashkakuna.
FF/pv/cg-k
Ashtawan shuyukuna:
