Mamallakta Tantanakuy kay shamuk awkarik punchaka kimsa rimanakuytami charinka, kallaripika Mamakamachiypak 158 niki killka mushukyachinatami shukniki rimanakuypi riksinka, kaypika llaktapi llakikunata Fuerzas Armadas tantanakuy yanapachun; kipaka, Ley Amazónica kamachiy mushukyachinata ashtawanka “El Gran Padrino” taripay katinapak wakichishka willayta paktanapak yuyarinakushka killkata arininka.
10H00 pacha tutamantami Club Sociedad Deportiva Aucas tantanakuyta riksirishpa unanchayta chayachinka, paykuna kay Ecuador llaktapi puchukay mishak kashkamanta.
Kipa 11h15 pacha tutamantapakmi No. 852 niki rimanakuyman kayachishka kan, ishkay yuyaykunatami llamkanka: Superintendencia de Compañías tantanakuyta pushak, kay Ley de Transparencia y Acceso a la Información Pública kamachiypak 18 niki killkapi pakatarishpa wakichishka willayta paskanapak, kay “El Gran Padrino” taripay ukupi ñawinchishpa katinapak; shinallatak, kay Oficio Nro. T.22-SGL-23-0040 killkata Llakta pushak kay 15 puncha panchi killa 2023 wata chayachishka killka pakalla kashkata paskanamanta rimanakuna, kaypika Llakta pushakpak wasipi punchata llamkay katishkami kan, ninmi.
Kimsa niki rimanakuymanka. 14:30 chishipakmi kayachishka kaypika Ley para la Planificación Integral de la Circunscripción Territorial Especial Amazónica kamachiy mushukyachinatami riksinkakuna, kaypika llaktakuna wiñarinapak llamkayriksichik pankata ruranaman kayachinatami rikuchin; Antisuyu llakta allukunata yanapanapak hayñikunata sumaychan; shinallatak, Desarrollo Sostenible y Común llamkaykullkita pakta pakta rakishpa chayachinapakpash.
Ashtawanka, kari warmi paktakana, warmikunata llakichiyta harkana anchuchinapash, chikanyachik llaktaykunatami kimichin. Kay socioeconómico y productivo wiñarinapak sinchiyanapakpash kayachin; llamkay paktanami sinchiyan shinallatak Antisuyu llaktapi kawsakkuna charishka yanaparishkapash sinchiyan, kayshina llamkay illay ashayachun.
Chaypachallatak, Mamakamachiypak 158 niki killkata chawpi mushukyachinapak killkata shukniki rimanakuypi riksinka, Llakta pushak, Guillermo Lasso Mendoza, mañayta chayachirka.
Kay rimanakuyka Comisión Ocasional de Enmiendas Constitucionales Minkarishka allichishka killkapi kimirishpami paktarinka, yachayta riksishka shinallatak tawka llaktayukkuna mañashkata chaskishka kipa, Fuerzas Armadas tantanakuyka istallaktapi paktarikushkata chaparashpa llakta kasiklla kanapi rikuchun yanapachunpashmi rikuchinka, nishpaka, yanapayka ancha mutsurikpi, chikanyachishka, ashalla pachapak, maypi mutsurikpilla kachun; Policía Nacional Tantanakuypak ukupi paykuna mañashkapi paktarishpa; uso legítimo de la fuerza paktarinapak kamachiyta chaparashpa shinallatak kay yuyaykunaka kaykutinlla, mutsurishkalla shinallak ancha ancha mutsurikpi ashtawanka kayshina paktarishka rikukkuna ñawinchishka yachaywan paktashkami kanka.
Puchukanapakka, Mamallakta Tantanakuy Codificación del Código Orgánico Integral Penal kamachiy rurana killkata ruranapak mañashkamanta riksishpa rimarinkakuna.
PV/cg-k
