Mamallakta Tantanakuypi, 116 ari apushitaywanmi, Llakta ñawpa pushak, Guillermo Alberto Santiago Lasso Mendoza runata, peculado llakichiywan Mamakamachiyta 2 yupay 129 niki killkata llakichishka nishpa shinallatak Corte Constitucional tantanakuypak dictamen 1-23-DJ/23 killkapi riksichishkamantapash shuk yuyarinakushka killkata arinirkakuna.
Kay yuyarinakushka killkapika llakta ñawpa pushak, Guillermo Lasso llaktapak kullkita tantachirka, riksirka shinallata pantachirkapash, kay Amazonas Tanker Pool yuyarinakushkapi, kayshinamantami Mamallaktachiypak charishka wakllirirka kimsanchishka ayllukunaman yallichikpi, nirkami.
Shinallatak, Función Judicial tantanakuyta yuyachin, kay Yuyarinakushka kilkaka Mamallakta Tantanakuy ukumanta kachashkami, llaktayukpak hatun yuyaypaktarimanta Ecuador llaktakunapak shutipi, chaymantami, Mamallakta Tantanakuypi yuyarinakushka killkata shuktak killkakunawan chimpapuranata shitarin.
"Llakta ñawpa pushakta llamkaypi mana paktarikukpi wanachinata shinallatak llamkaymanta llukshichinata ña mana paktarishkamanta, Mamallakta Tantanakuypi yuyarinakurka, Guillermo Lasso runaka, peculado llakimanta rikuna charin chaymantami llaktay kamachiypi ñawirina tukuy killkata Fiscalía, Contraloría tantanakuyman chayachin, paykuna kikin taripayta kallarichunkuna", kashnami, Henry Kronfle, Mamallakta Tantanakuyta pushak, nirka.
Kamachi killkakkunaka llakta ñawpa pushak, Guillermo Lass runa paktarishakta shitarirkakuna, kay muerte cruzada kamayta Llakta Ñawinchiymanta chishpirinapak paktarishkamanta, kayshina llaktaymanta shinallaktak wanachinamanta llamkaymanta llukshichinamantapash kinkushpa, kayshina paktarinaka llaktayuk chaypikanapakmi ancha wakllichin, nirkakuna.
Kay yuyarinakushka killkata arinina ñawpaka, Comps Córdova kamachi killkak nirkami kay ñawinchiyka Contraloría taripashkawanmi kallarirka shinallatak sukta hunu dólar kulli wakllichishkawan, kay Empresa Pública Flota Petrolera Ecuatoriana (Flopec) tantanakuy Amazonas Tanker tantanakuywan yuyarinakushkapi.
César Umajinga kamachi killkakka llaktayuk yanapaymanta yuyachirka. Fausto Fernández kamachi killkakka llakta pushakushpa kasilla kanapi, llamkaypi, yachaypi shinalaltak shuktakkunapipash mana llamkay chayashkata rimarirka. Shinallatak Carmen Tiupul kamachi killkakpash chay yuyaykunawan paktarirka, llaktayukmanta llamkakukpi wanachinaman kayachishkami karkani, nirka.
Llakt Ñawinchiyka tukuy mutsushkata tantachishpa Llakta Pushak kakpirakmi kallarirka, kashnami Fernado Cedeño kamachi killkak nirka. Rimanakuypika, José Agualsaca kamachi killkakka Guillermo Lasso runata wanachinami, pay rikuna charishkata llaktaypi kutichichun, nirkami.
Paymanta, Ramiro Vela kamachi killkakka Guillermo Lasso Mamallakta Tantanakuyta wichkashka kipa llamkashkata ñawinchinaman kayachirka. Nirkampashmi Fiscalía paktarichun mañarka. Shinallatak paykunapak yuyaykunata: Lenin Rogel, Jaminton Intriago, Jorge Álvarez, Fernando Jaramillo kamachi killkakunapash chayachirka.
AM/pv/cg-k
Ashtawan shuyukuna:
