Ecuador llaktapak kikin kawsayta sumaychachun mañaywanmi Mamallakta Tantanakuyta pushak, Gabriela Rivadeneira apukka, kay Sociedad Interamericana de Prensa (SIP) tantanakuy yuyarinakushpa yallik 21 puncha wayru killapi Ecuador llaktapi willachina kamachiyta anchuchichun mañashkamanta sinchita shitarishpa rimarirka.
Mamallakta Tantanakuypimi, Rivadeneira apukka, SIP tantanakuy yuyarinakushka killkawanka “2011 wata, aymuray killapi llaktayuk mañashkata Willachina kamachiyta anchuchichun” mañaywanka Ecuador llakta, Mamallakta Tantanakuypash llankashkatami wakllichinata mashkakun, nirkam.
“Shuk tantanakuy mañashkamanta, llaktayuk yuyarinakushkata mana wakllichiy usharinchu, kayshina mushukyaykunaka willachinata, rikuranatami yanapakun” nirkami.
Pakta willachinaka llaktayukpak hayñimi kan, chaytaka llaktami tukuy ayllukunaman chayachunka rikuranka, sumaychankapash. Willachinata rikuk kamachiyka Ecuador llakta kari warmi ayllukuna rimayta charinapak mashkaymanta kutichishkami kan; chaymantami ayllullaktakunapak, llaktapak willachina anta uyachina ñanpash ñawpa pachakuna shukllapak kashkamanta rakishpa kunaka tukuypak pakta pakta churashkamchik nirkami.
“Kay SIP tantanakuy killkashkapika shuk munayllatami charin, kaynashina, kacharishka rimay mana tiyan nishpa pantami chinpapurachikun”, nirkami.
Rimayta puchukaypika, SIP tantanakuytami kayachishpa “Ñukanchikpakmi iñikmi kan, shinaka mana kumurishunchu. SIP tantanakuypi llankak ayllukuna achikllata rikushpa sakirichik: ñukanchik llaktaka charikkunapak makiman mana kutin urmankachu, imashina llakta pushanapak rikuchiytaka Ecuador llaktayuk mañashkallatami katishun” nirkami.
Kay chishimi, Mamallakta Tantanakuypi apukkuna, 91 ari, 24 mana, shuk yurakpi, shuk mana apushitashkawanmi kay Sociedad Interamericana de Prensa (SIP) tantanakuy yuyarinakushka killakta shitarishpa arinirkakuna, “killkaka Ecuador llaktapak kikinmanta, chikanyashka, kikin yuyaywan kawsaytami wakllichinata mashkakun".
