Imbabura markapak, Otavalo kitipi, San Juan de Ilumán llaktapi Inti Raymita pusharka, sapan watami ñawpachamanta raymita aknan, 25 watatami ña pushamun. Kunan wataka, Gabriela Rivadeneira Mamallakta Tantanakuy Pushaktami raymikamayukta shayachirka.
Mamallakta Tantanakuyta Pushak, “Gallo Capitán” churarinata hapirka, kipaka kamachikkunawan, llakta runakunawan tanta tiyarirka chaymanta llaktapak hatun ñankunata katishpa San Juan Pocyo yakuman chayarka. Chaypimi mushuk raymikamayukman “Rama del Gallo” kamarita kurka
Kay ñanta purikukpi tawka takikkuna, tushukkuna, chiwawakuna tiyarka, shinallatak irilawan, sisawan sumakta warawashka apyukunata purichirka, shusktak takikunapash tiyarka; aswa, mikunakunapash mana illarkachu.
Ilumán Shulka Tantarita puashak, Jorge de la Torre kamachik, Gabriela Rivadeneira, yallik wata “Rama del Gallo” huchata chaskirka nishpa yuyachirka, chayka runakunapak yuyay unanchami kan nirka, shinami llakta runakunapak kushiyay karka, chaywanka llaktapak munayta paktachinatami nisha nin.
Mamallakta Tantanakuy pushakpak sinchi yuyayka llaktakunapak kawsaytarpuywan, ñawpayachaywan, ñawpa raymikunawan Ecuador llaktapi kaykuna sinchiyachina yuyaytami charirka, shina Mamallaktapi, Istallaktakunapi runakunapak yachay rikurichun nirka.
Shinami, Mamallakta Tantanakuyka llaktakunaman, llaktayukkuman chayashpa llankakun, chaywanmi Mamallaktapak tawkasami kawsayta, kawsaypura kimirinakuyta yanapan nirka.
Yachakkuna, makirurakkuna, tarpukkuna
Ilumán llaktaka Yachak Taytakuna(hampikkuna, shamankuna) tiyashkamantami hatun kakta riksishka kan, paykunami ñawpa hampinakunata yachan.
Kunkuk llaktami kan, 14 pata patsakri tupu chirikunuktami charin, 8 waranka runakunami kawsan. Tarpuna allpakunatami charin, millma puchkakunatami awan, chaypimi muchikuta, chakisarunakunata ruran.
MG/jc-kichwa
