Kay Soberanía Alimentaria y Desarrollo del Sector Agropecuario y Pesquero tantari, kay Ley de Tierras, de Agrobiodiversidad y Semillas kamachiyta rikunka; shinallatak Pesca, Banco de Desarrollo Rural kamachiykunata rikushpa katinka, chayka Banco de Fomento kullkiyuk wasipak ranti llankanka, kaytami, Mauricio Proaño kipa minkashka nirka.
Mushuk Allpa Kamachiypika pichka kamachiykunami tantarin, kunanka kallari killkami tiyan chaymi mushuk kamachiyta killkankapa tiksi kanka, kay kamachiyka kapak killakamami ña kallarik killkashka kanka.
Kay tantariman yaykurishka kamachiy killkakkuna llaktakunaman llukshinkapa rikushkata charin nirka, chay llaktakunapi kawsak runakunapak yuyaykunata apamunka nirka, llaktayukkuna kay kamachiyta rurankapa yuyayta kushkamantaka kipaman ashalla llaki tiyanka nirkami..
Llaktayukkuna paykunapak llaktamanta yuyaykunata kunka, paykunami ayllullaktakunawan llankanka nirka, wakin pachakunapika willaykuna mana chayashkachu, pushakkunapillami sakirishka. Ashtawankarin alli yuyayta charinkapa llaktakunapi, markakunapi, Mamallaktapi yachachishpa llankana kan, chay yuyaykunawanmi alli allpa kamachiy killkarinka nishpa yapa rimarka.
Kay Agrobiodiversidad kamachiypak, Pesca kamachiypak muyuntinpi, allpa kamachiywan chimpapurashpami minkashkakuna paktankapa rimanakunka, killkachun uchilla tantarita churarka, paykunami kamachiyta killkanka.
Kay kamachiykuna hawa rimanakuy tiyashkami, kapak killa tukurinkakama kay kamachiy ña kallarik killkashka kanka, kipami Mamallakta tantanakuypi rimarichun katinka nirka, kay kamachiy hillaymi Mamallaktapi mutsurin.
Mauricio Proaño, kamachiy killkak Banco de Desarrollo Rural shayachinkapa rimarka. Kaypaka tawka yachaykunatami rurashun nirka, kay kamachiy hawa rimanakunkapa tantarikunata, kimirishkakunata yuyaykunata kuchun kayashpa yaykuchishun nirka
Tukuchinkapa, kay Recursos Hídricos, Usos y Aprovechamiento del Agua kamachiy kamu Tupupi killkarishka kipa, tukuy Mamallaktapimi imashanina kamachiy paktashkata riksinkapa tukuykunaman riksichishun nirka, imashina kay kamachiywan llankanatapash rikuchishunmi nirka.
JLVN/pv/jc-kichwa
