Kay Desarrollo Económico minkarishka apukkunaka Manta kiti, Manabí markapi turismo llankakkuna llaki charishkata riksirkakuna. Gonzalo Mejía, Cámara de Turismo tantanakuyta pushakka 115 llankak wasikunallami 600 wasikunamantaka 1X100 manu kullkita chayachinapak killkarishkakuna, nirkami.
Kay runaka, Manta kitita pushak shinallatak Ministerio del Turismo tantanakuypash imashina paktanata achikyachinami mutsurin, ashtawankarin manu kullkita, kimichishka kullkita chayachinata rikuranapak ushaykunatami achikllata churana kan, nirkami.
Achikyachishpaka, kay 1X100 manu kullkitaka 2013 watamantami chaskikun, shinapash mintalak tawka wasikuna mana kay Ministerio de Turismo tantanakuypi killkarishkakunachu. Kay Turismo kamachiypi manu kullkitaka killkarishkamantami chayachina kan, ninmi. Kunanpika killkarishka mana tiyanchu, chayamantami mintalay wasita pushakkunaman achikyachina mutsurin, kunanmanta chayachina mana kashpaka manatakchu chayachinata rikuchichun, nirkami.
Kay Ministerio tantanakuy imallapi paktanata rikuchina anchami mutsurin, shinallatak kiti pushakkuna llakta riksichinapi llankakushkata yachana, manu kullkikunata imashina tantachikushka yachanapashmi mutsurin; kipamanka manu kullkita chayachinata yachachiyman kayachinami kan, kayshina llakikunata ama charishpa katinkapak, nirkami.
Shinallatak, Sebastián Sevilla, Turismo tantanakuyta pushakka, ñukanchikmi kay 1X1000 manu kullki tantachinata ushanchik nirka. Kay llaktata riksichik wasikuna mana killkarishkamanta rimashpaka Manta Kitiwan ishkay yuyarinakuytami killkashkata charinchik, kayshinami llakta pushaymanta tawka ushaykunata yallichishkanchik, kay paktanakunapi wasikuna killkana ushayta mana charinchu, ashtawanpash catastros ushayllatami charin, nirkami.
Kay Desarrollo Económico Minkarishkata pushak, Juan Carlos Cassinelli apukka, kayshina llakikuna allichina munaywan kamachiyta wakllichiy mana ushanchikchu, nirkami.
Kay rimanakuypillatak, Manabí markapi Turismo tantanakuyta pushak, Lucía Arias warmi karu rikurinapi rimashpa nirkami, Manta kitipi llankakkunami achkatak mana manu kullkita chayachishkakuna, shinapash Manabí markapika 80% llankakkunaka paktaymi kunankama kullki chayachishkakuna, nirkami.
Nirkapashmi kay planta central tantanakuymantami tawka yuyarinakushka killkata paktachichikunkuna, shinallatak llakta riksichinapi llankak wasikuna charikkunaka 2003 watamanta 2007 watakama manu kullki chayachinata kishpichikunami mañakunkuna.
Shinallatak, Cristian Pino runa Senplades tantanakuyta pushakka, Manta kitipi Turismo llankaypi llakikunaka llakta pushak ushayta chayachinata mana pakta pakta pushashkamantami kan, shinapash 2008 watamanta kay ushaypi paktaykuna pushayka paktami rikun, shinaka Ministerio, Kiti pushakkunapash chikanmanta mana llankakunchu ashtawanpash llakta pushakkunaka kikin ushay charishkatami paktachichikun.
Kay Desarollo Económico Minkarishkata pushak, Lídice Larrea warmika, Llaktata ama wakllichichun munaywanmi kayshina llakikuna allichinata rikurashun shinaka 1X1000 manu kullkita tantachinkapak, kayshina llaktayukkuna yanapayta pakta chaskichun.
JLVN/pv
