Mamallakta Tantanakuypi llankaykuna kay shamuk kullka punchami kutin kallarinka. Mamallakta Tantanakuyta pushak, Gabriela Rivadeneira Burbano apukmi, 316 niki apukkuna rimanakuyman 09h30 pacha tutamantapak kayachishka, kaypika Ley Reformatoria a la Ley Orgánica de Educación Intercultural rurarina kamachiymantami shuk niki rimakuyta katinkakuna.
Puncha llankanapak churashkami, Mamallakta Tantanakuy shuk yuyarinakushka killkapi Judicial tantanakuyta kamakkuna ñawpa diputado Jaime Hurtado González runa, paywan llankak runapash wañushka ama kunkarishka sakirichun.
Kayshina rimanakuyka Ximena Ponce apuk pushakushka Educación, Cultura, Ciencia y Tecnología minkarishkapi killkashkata rikushpami llankanka, pay apukka, kayshina kamachiy mushukyachiynapika yachachikuk runakuna kimsa niki yachachinapak yachashka pankata mana charishpa, shuktak yachanakunata riksichik iñik pankata charikpika, yachachik kanapak yaykuna usharinata yanapachun, nirkami.
Apuk warmika, kay kamachiypi riksirishka iñik pankakunaka kanmi: ciencias de la educación; ciencias exactas; ciencias de la vida; ciencias sociales; ciencias del comportamiento humano; artes; educación especial, kayshina yachayta charik runakunaka kay shamuk kimsa watakuna ukupimi chusku niki yachaypi yachachinata riksik iñik pankata paktana kan, kayshinami yachachik kanapak yaykuy ushanka, kaytami kamachiy mushukyachina rikuchin, nirkami.
Chinkayachishka willaypika, llakta yachana wasikunapi yachachik tukunapak bachillerato yachashka pankata riksirinmi, shinallatak kayshina yaykuk runakunaka sukta wata ukupimi yachachikta riksik iñik pankata paktana kan. Shinallatak kallari ishkay wata ukupika yachachinata munachik tantanakuykunaman yaykunami mutsurin nirkami.
Shinallatak, kay kamachiy arinishkamanta shuk wata ukupi, shuktay yachaykunata charik runakuna yachachik tukunapak mishanakushpa Categoría I escalafón docente patapi yaykushka kashpaka, Categoría G patamanmi yallichishka kanka, shamuk pachakunaka kay patapi kamaywanmi chaypi kanapak, wichiyanapakpash yanaparinka. Llaktapi Yachayta rikuk pushakkunami mayman yallinata rikuna kan, killa llankana kullki churashka kamayta chaparashpa, nirkami, kayshinaka Llaktapi kullkita rikuk wasiman paktami llankanka, nirkami.
Ximena Ponce apuk, shuk yachachikka chay suyu uku llakta yachana wasikunapurapi kuyuchishka kana ushanmi, kayshina llaktapi yachachik runakuna illashkata yanapanapak, kayshina llankaymanta kuyuchiypika kikin hayñikunata rikurashpami paktana kan, pakta mutusurishka kullkita chayachishpa, nirkami.
Killkata urichinapak kaypi clic llapi.
PV
