Mamallakta Tantanakuyta pushak, Gabriela Rivadeneira Burbano apukka, apukkuna 290 niki rimanakuyta katinkapak kullka 2 puncha, wayru killa 2014 wata, 9h30 pacha tutamantapakmi kayachirka.
Kay kutinpi apukkunaka, Gonzalo Aurelio Cortez Cervantes runa wanarikushkamanta kishpichichun mañashkatami riksinkakuna, kayshina mañaytaka Justicia y Estructura del Estado minkarishkapi llankak apukkunami riksishpa shuk killkata rurashkakuna, kay killkatami riksinka, minkarishkataka Mauro Andino apukmi pushakun.
Wanachina pachata 30% paktsakta ashayachiy
Minkarishka apukkunaka, rikuchishka killkapika, Mamallakta Tantanakuypi apukkunaka, wanachinapak 20 watakuna churashkamanta 30% (kimsa chunka patsakta) pachata ashayachichunmi mañan, kayshina paktaytaka Kamachiy Awlli kamachiypak 97 nikipi rikuchishkata katishpami rurarkanchik, ninmi.
Apukkunaka, kay runa ancha unkushka kashpa, paypak aycha sinchita wakllirikukpi, mana kuyurinata ushakushpapash, wanachina wasipi hampikunata, hapiritapash paktami charin, ninkunami.
Shinallatak apukkunaka, Llaktapi hampina wasita, Justicia, Derechos Humanos y Cultos llankay wasitapash, Gonzalo Cortez runata pakta pakta utkashpa yanapachunmi mañankuna.
Kay runaka shuwashpa wañuchishkata riksishpami wanachishka karka, kayshina llakichiytaka Wanachinapak Kamachiypak 550 nikipimi huchachin, shinallatak 2 yupay, 552 nikiwanmi wanachiynata riksichin, chaymantami ishkay chunka watakunata wichkashpa charinata churashka; kunankamaka pusak wata pusak killatami wichkashka kawsakun.
MG/pv
