Mamallakta Tantanakuyta pushak, Gabriela Rivadeneira Burbano apukka, 285 niki apukkuna rimanakuyman kay kullka puncha 9:h30 pacha tutamantapakmi kayachirka, kaypika Soberanía, Integración, Relaciones Internacionales y Seguridad Integral Minkarishka apukkuna llankaywillaypi Ecuador llakta Venezuela llaktawan kipikunata chapanapi yanaparinapak riksichik killkamantami rimanakunkakuna.
Minkarishka apukkunaka killka yuyaypaktaripika ninmi, charinakunata, umachinkachinata, shuktak llakichiykunatapash pakalla apamushpaka llaktapi kullkitami wakllichin, shinallatak ashtawankarin manu kullkita llaktaman chayaytami ashayachin, chaymantami, kayshina chapaykuna pakta kachun ishkantik llakta willaykuna charishkata chimpapuranapak kayachin.
Mamallaktapura makipurashpaka kipikuna apamuypi chapanata yanaparinka, shinallakta Ecuador llaktaka Venezuela llakawan tawka llankaykunata ñawpakman apanapak ñami yuyarinakushka killkata charinkuna, mashiyashkakunami kan, ninmi.
Apukkuna rimanakuypika Ecuador llakta Turquía llaktawan mintalaypi yanaparinapak killkatapashmi riksinkakuna, kayshina makipuranapak killkawanka llankanata riksichinapi, llakta wiñarinapi, pachamamata rikuranapi, mushuk yuyaykuna mashkaypi, llankay mushukyachinapi, ushaypi, chukipi, tarpuypi, mikunakuna ruraypi, wampukkuna chayana ruraypi, karu uyachiy sinchiyaypi, wasichiypi, kitikuna wiñariypi, llakta rksichiypi, hampinapi, llaktayuk pakta kawsaypipashmi yanaparinka.
Kay llankaywillay killkataka Relaciones Internacionales Minkarishka apukkunami rurashka, paykunaka hatunyachishpami llaktapi kullkiwan llankay sinchiyanapi, achka kullkiwan llankay wiñachiynapimi yanapanka, shinallakta llakta mushukyaypi sumak kawsay paktanapipashmi sinchiyachinka ninmi.
Punchapi llankanapak kimsa niki rimanakunapakka Bayron Pacheco apuk chayachishka killkatami riksinkakuna, kay killkapika Estados Unidos de Norteamérica, Unión Europea suyu llaktakuna, Canadá, México llaktakumanmi, Ecuador llakta ayllukuna llakitukukpi, wañukpi, ancha unkukpi, aychapi yuyaypipash llakichiyta chaskishpa wañunalla ancha kakpipash kay visa humanitaria pankata karachunmi mañayta chayachirka.
PV
