Wawakuna, imillakuna, rukukunapash karu llaktaman mana kamachiywan rinaka hatun llakimmi kan, México llaktamanta Estados Unidos llaktaman purinami yalli llaki kan, pakalla runakunata pushakkuna tiyan, paykunaka pushashkamanta achka kullkitami hapin, shinapash tawkakutinmi purun pakllakunapi pushashka runakunata shitashpa sakin, wakinpika chaypimi chay runakuna wañun, shinami Derechos Colectivos tantariman yaykurishka Betty Jerez kamachiy killkak rimarka.
Wawakuna, imillakunami ashtawan waktaykunata, llakikunata hapin, kay llakikunataka chaypilla sakichinami kan, chaymanta Tungurahua markamanta kamachiy killkak, “Dile no a la migración riesgosa” yachachiyta runa llaktakunaman riksichina nirka, ashtawankarin chay chusku runa llaktakunapi achka wawakuna llakita charikkunaman riksichina kan nirka.
Kay kamachiy killkak, yallik watakunapi runa warmikunata wañuchishkatami uyarkanchik nishpa willarka, paykunaka kusakunata rikunkapa shuktak llaktaman rishpa wañurka, churikunata hatun taytapak, ayllupak makipi sakishpa rirka, chaymantami nanari, llakikuna shunkupi yaykurin.
Kay llakikunamantami Ecuador llaktamanta kamachikkuna llaktapura tantarishpa llakipi purik runakunata harkankapa yuyarikunata mashkan, mana kamachiywan purina llakikunata, achka kari warmi wawakuna, imillakuna wañuykunata tukuchinkapa yuyarikunata ruran.
Tukuy Ecuador llaktapi kawsak runakunata “no a la migración riesgosa” llakita mana ninkapa, tantarichun mañan. Kamachiy killkakkuna wawakunapak, malta runakunapak mana kamachiywan rina hatun llaki tukurichun ñakarishpa katishun nishpa, runakuna yuyayta hapichik nishpa kayarka, ayllumi wawakuna tukuypi wiñana wasi kan, kuyay tinkirishka kan, chaypimi paykuna kushilla kana kuska, nishpa rimarka.
Ayllukuna kutintak tantarichun sinchitami llankana kanchik nirka, chaypak purik runakunata ukllachun kamachiykunata wallpana kanchik, shina rimashpami tukuchirka.
JLVN/pv/jc-kichwa
