Apukkuna 294 niki rimanakuypimi Mamallakta Tantanakuyta pushak, Gabriela Rivadeneira apukmi Banco del Instituto Ecuatoriano de Seguridad Social (BIESS) kullki wasita pushanapak llankankukmanta, samakukmanta akllashka runakunata llankaypi kallarichirka.
Mamallakta Tantanakuyta pushakka, BIESS kullki wasi pushanapak akllashka runakuna sumaychashkata chaskishka kipaka, tukuy llankaykunapi alli rikunmunaytami chayachirka.
Gabriela Rivadeneira apukka, Valeria Gabriela Robalino Aguirre warmita kallari pushanapi, shinallatak Terry Christiansen Zevallos, pushakpak rantipakmi, Llankakuk ayllukunapak shutipi tiyachirka, shinallatak Luis Efraín Cazar Moncayo, Joaquín Alfredo Chanabá Vega runakunaka Samakuk runakunamanta pushak, pushakpak ranti llankachunmi tiyachirka.
Kullki wasita pushakkunaka kaykunami kan: Instituto Ecuatoriano de Seguridad Social tantanakuyta pushakkunamanta pushak, paymi pushanka, arinichik apushitaytapash charinka; Consejo Directivo del Instituto Ecuatoriano de Seguridad Social tantanakuymanta akllashka shuk runa, akllanapakka Llakta pushakmi kimsa shutikunata chayachinka; Llankakuk ayllukunamanta shuk runami Consejo de Participación Ciudadana tantanakuy mishachishpa akllashka yaykunka; shinallatak, mishanakushka akllashka shuk runaka samakuk ayllukunaman shutipimi yaykunka.
Kallaripi llankak pushakkunaka chusku watatami llankankakuna. Paykunapak washamana yanapak pushakkunata charinka, paykunapash mishanakushkamanta akllashkami kanka, Consejo Directivo del Instituto Ecuatoriano de Seguridad Social tantanakuyta pushakllami mana kayshina akllaymanta shamunka, llankaypika kamachiy paktachishka shuktak yaykunkamami llankanka.
Kallaripi pushakkuna, pushakpak ranti ayllukunapash Llankaypi tiyachinapak ñawpaman Superintendencia de Bancos y Seguros tantanakuymi chanishka kanka. Pushanapi kimirishka ayllukuna, pushak runata chikanyachishpa, shuktak llankayta mana charina ushankachu, suman yachana wasipillami yachachiypi llankay ushanka, paypak llankayka chikanyachishkamanta sukta killakamapash chaypikanami paktanka, shuktak llankayta, kullkiwan llankaytapash mana chariy ushankachu.
Pushanapi llankak ayllukunaka paykuna paktashkata kamachiywan, wanachiywanpashmi kutichina rinsirinkakuna.
JLVN/pv
