Kay Judicatura Tantarita Pushak, Gustavo Jalkh kayashka, Mamallakta Tantanakuyta pushak Gabriela Rivadeneira chay Centro Judicial Contra la Violencia de la Mujer Otavalo wasipak llankayta kallarichichun kayashka chayarka, chay wasika Imbabura markapimi tiyarin.
Kay mushuk paktakay wasika, kay kitipak patsak waranka runakunatami chaskinka, shuk warmi kishpiychikwan, sukta paktay llankakwan, shuk tukuytalla llankakwan, Violencia Intrafamiliar llaki rikuk ishkay chapakwanmi punchanta llankanka. Shinallatak shuk hampik, yuyay hampik, runata yanapak kimsantin tantarishpa punchanta llankanka. Yayamama kamachikkunawan rimakukpi wawakuna samarichun shuk ukuta churarka.
Paypak rimaypi, Mamallakta Tantanakuyta pushak, Gabriela Rivadeneira, kay Código Integral Penal kamachiy arinirishkata willarka, warmita, aylluta llakichishkamanta wanachinatami shuk wankuri tiyakta ashtawankarin yachachirka.
Mushuk sami wanachinatapash rikuchirkami, chaykunaka, warmi kashkamanta wañuchikpi 25 watata wanachina nin. Shinallatak ayllullaktakunaman kay Código Orgánico de Procesos mushuk kamachiy killkarikushkatapash rikuchirka, kaywan ashalla pachata wanaykuna katinka nirka, rimashpalla wanachi katinatapash rimarka.
Paktakay tiyachun llankakkuna, yachachik ayllullakta warmikunata llakichina, waktana ashayachun sinchita llankanka. Chusku warmimanta shuk warmimi paypak kawsaypi waktayta charishkata rikuchin; ishkaymanta shukmi yuyayta muspachishka. Patsakmanta 63 runa warmikuna, yana warmikuna, pakllapi kawsak warmikunami paypak wasipi, punchanta kawsaypi llakichishka kawsashka.
Mamallakta Tantanakuyta pushak, Mamallakta llaktaypi mushukyarishkata rimarka, kamachiy killkayta kimsa warmikuna pushakushkamantami mushukyan nirka, 42% patsakri warmi kamachiy killkakkuna tiyan nirka, paykunami tukuy runakuna paktapakta yuyaywan kamachiykuna killkarichun yanapashka.
Chay tantariman Imbabura markamanta Marisol Peñafiel, Agustín Delgado kamachiy killkakkuna chayarka, shinallatak kamaywasimanta kamachikkuna, Imbabura markamanta Chapak Kamachikkuna chaypi karka.
UNIANDES yachanawasiwan yuyarinakuy
Chishiman Gabriela Rivadeneira Mamallakta Tantanakuyta Pushak, UNIANDES yachanawasiwan yuyarinakuyta killkarka, chay yachana wasiwan runakuna mirari hawa taripayta ruranka, runapak hayñikunata kay katikuykunapi yaykuchinkapami taripayta ruranka.
Kay yuyarinakuywanmi Eacuador llaktapi kay llankayta akllak hampikkunata, ayllukunata yanapachun shuk mushuk kamachiyta wiñachinka.
Kay yuyarinakuytaka, Gabriela Rivadeneira Mamallakta Tantanakuyta pushakwan, Dra. Emperatriz Gómez Armijos, UNIANDES yachana wasipak rikurikwan shutikunata aspirka, chaytaka Ibarra kitipak, Mons. Leonidas Proaño ukupimi shinarkakuna.
