Mamallakta Tantanakuyta pushak, Gabriela Rivadeneira apukka kay “ Desfile de la Ibarreñidad” raymipak akllashpa kayashkami karka, kay raymika Imbabura marka 480 watakuna wiñarishkamantami paktashka. Mamallakta Tantanakuyta pushakka ciudad blanca kiti wiñarishka watakuna paktashkamanta napaytami chayachirka
Kay “Desfile de la Ibarreñidad” tushuyka chaska puncha chishimi Camilo Ponce kuska ñanta purirka, kay ñanka Ciudad Blanca shuti samana pampa kuchillapimi sakirin. Mamallakta Tantanakuyta Pushakka shuk rikunapak tiyarinapimi, Álvaro Castillo, kiti pushak; Pablo Jurado, marka pushak, tawka apukkuna, llakta pushakkuna, kayachishka mashikunawan kay raymita rikurkakuna.
Kimsa pachakuna yallitami, takikkuna, tushukkunaka, Bolivia, Colombia llaktaman, Ecuador llaktapak kitikunamantapash kawsayta riksichishpa tushurkakakuna.
Kay raymipika sisakunawan, hatun rikunakunawan allichishka antawakunapashmi kushiyachinaman chayamushka karka. Imbabura markamanta, Ecuador llaktamanta ayllukunapa, tantanakushka takikkuna, tushukkuna, kaspillapi purikkunapashmi chayamushka karka.
Kay Raymipika, Mamallakta Tantanakuyta pushakka Ibarra kiti paypak raymipi kashkamantami naparka, Imbabura markapi llaktakuna riksina tawka tiyashkatami willarka, shinallatak tukuy Ecuador llakta ayllukunatami kay raymiman chayamuchun kayachirka.
JS/CV
