Mamallakta Tantanakuyta ishkay niki kipa pushak Marcela Aguiñaga apuk, kunan puncha Guayaquil llakta, Centro de Privación de Libertad Zonal 8 wikchana wasipi wichkashka J.L.R.M. runa imashina kawsakukta rikunaman chayarka.
Mamakamachiypak 120 niki, 13 yupay killkapimi kayshina mañaykunata imashina Mamallakta Tantanakuyka paktana riksichin, ninmi “runa kawsayta yanapanapak huchachishkata kishpichinata ushanmi”, shinallatak Kamachiy Awllipak 96, 97, 98 niki killkapipash kayshina kishpichinapak imalla paktana charishkatami riksichin nirkami apukka.
Nirkapashmi, J.L.R.M. runaka shuwashkamanta 6 watatami wichkashpa wanachinapak churashka kan. Kay punchakamaka 2 wata 6 killatami wichkashka wanachirikushka, nirkami.
Wichkashka kawsakuk runaka tuberculosis pulmonar, VIH unkuytami charin, chaymantami kay 30 puncha raymi killapi paypak llakta, Santa Elena markapak Defensor Público kamakwan kay wanachiyta kishpichichun mañayta chayachirka, nirkami.
Aguiñaga kipapushak apukka, Comisión Legislativa de Justicia y Estructura del Estado minkarishkapi llankan, PPL willachikwan rimanakuypi nirkami, Wichkana wasi, Hampina wasimanta willashkata chaskirkani, kaypimi J.L.R.M. runa ima unkuy charishkata, ima hampikuna chaskinata, hampikuna paktanatapash rikuchin, nirkami.
Kay willaykunawanmi, Aguiñaga apukka rikunaman rishkatapash willashpa killkanka, kay willaytaka Justicia Minkarishka apukkunamanmi chayachinka, paykunami kishpichina paktashka mana pakta kashkatapash willanka, kay willaytami Mamallakta Tantanakuypi apukkuna yuyarinakunka.
