Mamallakta Tantanakuypak 290 yupay tantaripi, Llaktata Ukllak, Ramiro Rivadeneira, kay Derechos de las Personas en Movilidad Humana tantari alli pushakta rikushpa, kari warmi wawakunata, imillakunata ukllakta rikushpa alli nirka.
Kay rimaytaka llakirishpa purik warmi wawakunata, kari wawakunata, imillakunata ukllakta rikushpami allimi nirka, Grupo Parlamentario de Movilidad Humana, Linda Machuca kamachiy killkakta yupaycharka.
Runakuna purikpika, ayllukuna pakirin nishpa Ramiro Rivadeneira, kutintak ayllukunata kutintak allichinata mana usharishkachun nirka, chaypakka tawka llakikunami rikurin nirka, sapan Mamallaktakunapi yanapak kamachiykuna mana tiyanchu nirka, chaymantami mushuk yanapak kamachiyta rurana nirka, shina ukllana hayñita paktachichun, chaytak aylluwan kawsankapak llakirina ñankunata ama hapichun nirka.
Kay llakikunaka sinchimi kan, Estados Unidos llakta purikkunaman llakichik kamachiyta churashka nirka. Mamallaktakunapak saywapi taririk wawakunata, imillakunata kay Acta de Reautorización de Protección a Víctimas de Tráfico kamachiy yanapan, mayhan wawatapash saywakunapi paykunatalla ama charirichun, imamanta rishkata yachakchayankakama charina, kipa mayhan Mamallaktamanta kakpipash chayman kachana.
Kayta rikushpami, Llaktata Ukllak runakuna ama llakita purichun Mamallakta shuk harkak kamachiyta rurana nirka, ama shina llakita shuktak llaktakunaman richun llaktakunapi willana nirka, chay willaywan yayamama llakirishpa ama wawakunata kachachun, Mamallaktapak saywakunata yallikushpa ama llakirichun nirka.
Paymanta, Jean Pierre Montalvo, Benalcázar yachana wasipi yachakuk, wawakuna, malta runakuna Mamallatapak saywapi purikta uyashpa llakirirkami, shina purinata mana pukllanachu nirka, aylluwan kutin rikurina hayñita paktachinkapami shina ruran nirka, chayka may llakimi kan nishpa llakirirka.
“Kay Ecuador llaktapi kawsak runakuna tukuy Mamallaktapi kawsak runakunami wawkikuna kanchik yuyanchik”, runakunaka imatak kanchik nishpa hamutashami shinanirka, paypak llaktayaykuna shinallatakmi kanchik nirka, paykunapash kikin aylluntin kawsana hayñitami charin.
Tawkapura, Verónica Feicán, Ministerio del Interior kachashka, Ecuador llaktami purik runakunata chaskinkapa sapi llakta kan, mana kamachiywan kachanata rikuk llakta kan, chaymantami kay kamaywasika shuktak mushuk ñankunata rikuchirka, shinami kay Plan Nacional contra la Trata y el Tráfico de Personas yuyarita 2006 watapi hatun willayta rurashka karka.
Shinallatak, María Landázuri, Movilidad Humana Kipa Hatun Kamachik, Mamallakta Tantanakuykuna ayllukunata tantachinkapa yuyarishpa paktanami kan nishpa rikuchirka, chaypakka shuk kamachiywanmi allichina kan.
Ista hatun kamachikkuna willanakunkapa shuk ñanta mashkashpa llankakun nirka, kipa istawasikunami Estado Unidos llaktapak allikawsay wasiwan chayta rikushpa llankan nirka, chay wasimi wawakunata chaskina, puñuna wasikunata rikuchinata charin, chay wasipimi arininkakama charin. 56 wawakunami paykunapak aylluwan pakakukushka, chaykunamanta ishkaymi illan, shina willashpa tukuchirka.
Kay minkashka tantari tukuripi, payllatak takik, Damiano pay wiñachishka “Horizonte Frío” takita rikuchirka, chaytaka Núñez wawkipurami takirka, wawakunami takishpa yanaparka. Kay takika kari warmi wawakunapak, imillakunapak aylluwan tantarinkapa rishpa llaki kawsaytami uchillayachishpa uyachirka.
JLVN/eg/jc-kichwa
