Kay Código Orgánico Integral Penal, COIP kamachiy kamuka 180 yupaywan killkashka kipu kamupimi llukshirka, kay kamachiyka awaki 10 puncha panchi 2014 watami llukshirka, shinpashkay kamachiypi 10 inti puncha karwal killami tukuy paktarinaman yaykurka, kayshina paktayka puchukay mañayta paktashpami killka llukshishkamanta paktsak pusak chunka puncha kipami tukuy paktarinaman yaykun, shinapash Código Orgánico de la Función Judicial kamachiymanta chikanyachishka nikikunaka manarak paktarikunchu.
Wanachina kamachiy mushukyachiyka 80 watakuna kipami chayashka, kayshina llankayka llaktayuk pakta kawsachun, runakunapak kawsaytapash sumaychanapak, kamaypash pakta charinapak alli paktaymi, kayshinami llakichikkunawan chimpapurashpa mishanka.
Kay kamachiyka Mamallaktapak mutsushkata, hayñikuna achiklla ñawinchiy, taripaywan tiyashkamanta tiyachun rurashkami kan, kayshinami ayllukunata pakta ukllay, utkashpa ñawinchiypash kay wanachiypi yaykushka ayllukunapakka tiyanka. Chaymantami, Kamachiy Awllipi apukkunaka Código Penal, Código Procesal Penal y Código de Ejecución Penal kamachiytaka shukllapi tantachishpa pakta allita ruranka.
Kay kamachiypika ñawinchiynamanta rakishka nikikuna tiyashkatami shukllapi tantachin, shinaka 200 wanachinapak kamachiykunami tiyak karka, kaypimi tukuymanta llakichikpi ñawinchina wanachinapash tiyak karka, kaypika awkakunapak, chapakkunapak, llakichishka warmikunapak, antawa purinapak, allpamamapak, umachinkachinapak, illapa charinapak, shuktakunapashmi tiyak karka, kayshina kamaywanmi kamay paktachina mana achiklla karkachu, kaykunami kamay paktarinapi llakikuna tiyarka.
Kayshinami, Ecuador llaktapak Código Orgánico Integral Penal kamachiypi mushuk llakichiykunata riksichishpa churashka, llaktayukkunaka ancha llakikuna tiyashkamanta kutichishkami kan, ashtawankarin, runapak kawsayta, charishkata, kay pachapi kawsakkunata llakichishkata harkanapakmi kan, kaypika mushuk 20 llakichiykunatapashmi riksichin, kaykunami warmikashkamanta wañuchiy, kullki chinkarikun nishpa manchachiy, kullkimanta wañuchiy, kullkita pakalla mañachiy, kullkita pakalla tantachiy, makay, istallaktaman pakalla pushay, runakunata pakalla llankachinapak apay, yachashkawan mana pakta llankay, llaktakunata llakichiy, llakichiynapak tantanakuypashmi mushuk llakikunaka kan.
Kay COIP kamachiypika wanachiynapak kallariy yuyaykunata kutichik mañaykunapash kimichishkami kan, shukka, llakichishka kipa tukuyta allichiy, kaypika riksirishka allichiyshkata rikuchina, ashtawankarin, llakichina ñawpa shinaman chayachun, shinallatak llakita chaskikpash alliman chayachun, llakichiy ashayachunpash. Imashina allichiy, mashna kullki chayachinaka ima llaki tiyashkamanta riksirishkami kanka, ima charishka wakllirishka, ima llakichiy tiyashkamantami kanka.
Kay wanachiyna kamachiypi Código de la Niñez y Adolescencia kimichishkami kan, kayshinami kamachiywan wakllirishka wamrakunata pakta ñawinchiyman chayachinka, shinallatak wanachiypash llaktayukwan pakta chayachun, yanapachunmi rikuchin, mana wichkashpa llakichiynallata rikuchinchu.
El CÓDIGO ORGÁNICO INTEGRAL PENAL kamachiy Kipu kamayukpi killkashkata kaypi urichiy ushanki: http://www.asambleanacional.gob.ec/system/files/document.pdf
EG/pv
