Mamallakta Tantanakuy kachashkakuna Zobeida Gudiño, Liliana Guzmán kamachiy killkakkuna 2014 watapi, Warmi Kamachiy killkakkuna Usya Hatun tantaripi kanka, kayka Ruanda llaktapimi kanka, chaymanka 45 Mamallaktamanta, 150 kamachiy killkakkuna tantarinka.
Kay tantarimanka Foro Global de Mujeres Parlamentarias (Wip) tantarimi kayashka, sitwa killa, 1 punchamanta, 4 punchakama, 2014 watapi kanka.
Kay hatun tantaripika, hatun willaykuna, rimanakuy patakukuna tiyanka, Ruanda llaktapi imashina warmikuna pushakushkata yachanka; shina imashina warmikuna llaktaypi, kasilla kawsayman chayankapa arininata atirinakunka.
Kamachiy killkak Zobeida Gudiño yachachushpa, willashpa chaypi kanka, payka kullka 3 puncha, sitwa killapi yachachinka: “Mamakamachiy imashina katikukta, kariwarmi pakta kankapa imashina kamachiywan llankakushkata, warmikuna paktanamanta willashpa yachachinka”; warmi kamachiy killkakkunapak hayñikuna kamachiy killkaypi, Mamakamachiypi tiyarichun ushanunka, chikan chikan Mamallaktakunapi alli kachun rimanakunka.
Kamachiy killkak, kay llaktapi kariwarmi rimanakuy alliyashka, 2000 watapika Mamallakta Tantanakuypi 20% patsakrillami warmikuna tiyarina karka, 2013 watapika, 48% patsakrimi warmikuna tiyarinaman chayarka, chayka tukuykuna tantarishpa shina paktarka.
2008 watapi Mamakamachiyta Ecuador llakta kawsak runakuna arinishka yanapan Zobeida Gudiño nirka, shinami kariwarmi paktapakta tukuyllapak llankaykunapi arinina kachun yanapan, akllaykunapika kariwarmi katishpa akllarinami kanka. Kaykunami Ecuador llaktata, hayñikunata kamachun, warmikunapak ñakarita ukllachun kachan.
Kamachiy killkak Liliana Guzmán, 3 puncha, sitwa killapi Ecuador llaktapak llaktaypi warmikuna yaykurishkata rikuchinka, Mamallakta Tantanakuyta pushayman kunan kimsa warmikuna pushankapa yaykurishkata rikuchinka, kaymi ñukanchik Mamallaktapak wiñaykawsay kan.
Azuay markamanta warmi kamachiy killkak, kaymi allpapachapi tantaripi kana Ecuador llaktapak mushuk kan nirka, “ñawpa watakunaka shuktak Mamallaktapi kay tantari rurarikpi mana chayarkanchikchu, kunanmi Ecuador llaktapi hayñimanta, ruraymanta, llankaykunapi imashina paktashkata allpapachaman riksichina, willana maymutsurik kan” nirka.
JLVN/pv/jc-kichwa
