Yaku Kamachiy hawa Tukuylla Rimanakuypika, Cotopaxi markapak tantanakuykunamanta pushakkunaka, yakuta alli rakina kachun, ama shukpaklla makipi kachun rirkakuna; ayllullaktakuna kamachiywan llakita charishkata allichichun; yakupak shuk kullki wiñarichun; Plurinacional del Agua Minkashka tiyachun; urkukuna yakuta charik kakpi ukllashpa wakaychina nirka.
Soberanía Alimentaria Minkashka, Miguel Carvajal, kay kamachiyka Ecuador llaktapi kawsak kari warmi runakunatami yanapanka nirka, mikuna, awkikay mikuna, murukunata pukuchina llankaypash runakunatami yanapanka.
Kamachiy killkakka, imashina kashpapash yakuka shukpaklla makipi mana sakirinkachu, shina llakikuna rikurikpika chayta rikuk kamachikkuna kutsik, utkalla harkanata charin.
Yaku ama shukpaklla makiman richun tukuykunami shuk yuyaytalla charina kan; yakuta paktapakta rakinkapa tukuykunaman riksichina; llaktakuna charimushka yakuta kamaywasi ukupi unipak Ecuador llaktapi kawsak runakuna charichun; runakuna mikuchun, mikuna awkikay kachun, pukuchichun kamana nirka.
Shinallatak, yaku ama mapayachun punchanta rikuna mutsurinmi, yakuta mapayachikkunata wanachina.
Chay rimakkunamanta, Humberto Cholango, Conaie tantanakuyta pushak, yaku kamachiy ayllullaktakunata, yakuta hichak tantarikunata yanapachun mañarka, manarak kamachiyta killkashpa rimanakuy rikuchishka llakikunata asha asha allichishpa katichun nirka.
Cotopaxi marka Tantanakuymanta Pushak, Mario Alomoto, yakuka mana paktapakta rakishka taririnchu, kay rikuykuna rikuchishka yuyaykunata yaykuchik kachun.
Jorge Guamán, akllashka markapushak, ayllullaktakuna kachashka 70 yuyaykuna mana rikurinchu nirka. Ayllullaktakunapak runakunaman waka imata nisha nishkata willarka; shinallatak urkukunata kamankapa kullki mutsurishkata willarka.
Pastocallle tantanakuymanta, José Pila yaku urkukunata wakaychinaka ayllullaktakunapak makipimi kan nirka, chaypakka Mamallakta yanapana mana tiyanchu nirka.
Tantanakuykuna, paykunapak sapsi hayñita hapishpa tapuchun mañamurka, Leonidas Iza Salazar shina nirka, shukpaklla allpata charikkuna 63% patsakri allpata charin, 64% patsakri yakuta charin; shinallatak tantanakuykuna 68% patsakri allpata charin, 13% patsakri yakuta charin nirka.
Yakupak kullkika, urkukunata wakaychinkapa llankaypi churankapa, yaku pukyukuna ama chakirichun harkankapa kanka, Olmedo Iza shina nirka.
Yakuta charik runakunata Emilio Tipán ukllarka, yakuta alli rakinami mutsurin nirka, ashtawanpash waka kuskapi kak yakutapash ukllanami kan nirka.
Yakuta kamachiywan rikuna, Remigio Sillo nirka. Shinallatak ishkay kimsa mañakkunaman yakuta mana kuna nirka.
Kay rikuchishka yuyaykunata kipaman hapina, Mamallaktapi rimanakuymanta hapina.
RSA/am/jc-kichwa
