Llakta Pushak, Guillermo Lasso llaktaman willay chayachiykuy ukupi, Mamallakta Tantanakuyta pushak, Guadalupe Llori Abarca kamachi killkakka Llakta pushaktami llaktayuk kasiklla kawsay mashkaypi, llakta sinchiyanapi, tarpuk paklla runakunata, irki wawakunaman mikuna chayachinata, wakchakunata yanapanapi, warmikuna wakllichiyta harkanapi llankanapakpash kayachirka.
Mamallakta Tantanakuyta pushak, Guadalupe Llori Abarca, kay 26 puncha aymuray killami, Consejo de Administración Legislativa wankuripak 032- 2022 niki rimanakuyta kallarichirka, rimanakuypika kay wankuripi ishkay llankakunata huchachishkatami riksinkakuna, shinallatak kamachi killkakkuna chayachishka kamachi ruranapak tawka kamukunatami akllarkakuna.
Mamallakta Tantanakuyta pushak, Guadalupe Llori Abarca kamachi killkakka, llankashkata Llaktaman riksichiyna ukupi, Llakta pushaktami llaktapi kasiklla kawsaypi llankanaman, llankay wiñachinaman, tarpuk paklla runakuna aylli kawsay yanapanaman, wakcha warmikuna llakichiytapash chimpapuranamanmi kayachirka.
Pushak Guadalupe Llori awkakunapak raymiman chayarka, Batalla de Pichincha atiriy ishkay patsak watakunata paktashkata yuyarirka, kay raymimanka Fuerzas Armadas del Ecuador hatun tantanakuymi kayachirka. Guillermo Lasso llakta pushakwan shinallatak Llaktapak llankaywasi pushakkunawanpash chaypi karka, kay raymipika llakta kishpirinapak wiñayta yuyarina atirinakuypi wañushka ayllukunatami sumaychashpa yuyarirkakuna.
Mamallakta Tantanakuymi Derecho a la Salud Minkarishkapi allichishka llankaywillayta riksishpa kallarirkakuna, kay taripaypika llaktapak llankakkuna ancha unkushkakunapak, mana riksishka unkuy charikkunapak hampikunata mana pakta tantachishkatami taripashka kan; ashtwanka kay taripaypika hampina wasikuna imashinalla llankakushkata.
Kay Corte Constitucional tantanakuyka Llakta pushak kay Ley Orgánica de Educación Intercultural (LOEI) kamachiy mushukyachinamanta mamakamachiywan waktarishka nishpa mañashkatami shitarin, kay kamachiytaka Mamallakta Tantanakuymi 13 puncha pawkar killa 2022 wata arinirka, kaypika yachachikkunapak killakullkita paktarichinatami rikuchin.
Kay 772 niki rimanakuy kutin kallariypika, Mamallakta Tantanakuypimi Ley para Impulsar la Economía Violeta kamachiy rurana killkata riksishpa kallarirkakuna, kay kamachiywanka kari warmipash llankaman pakta chayachunatami yanapanka shinallatak llaktaykunata wiñachinapika warmi ayllukuna ashtawan kullkillankaypi sinchiyachun paykuna yachashkatapash ayllukunaman chayachichunpash, shinami tukuykuna pakta pakta llankay charinata sumaychanka.
Kay Ley para Fomentar la Producción, Comercialización, Industrialización, Consumo y Fijación del Precio de la Leche y sus Derivados Kamchiy rurana killka Soberanía Alimentaria Minkarishkaman tikran, kaypimi kamachi killkakkuna Mamallakta Tantanakuypak ishkay niki rimanakuypi chayachishka yuyaykunata allichinkapak.
Kallari shuk wata llankaypi, Mamallakta Tantanakuyka llaktayukwan makipurashpami llankashka, llaktakunaman chayashpa mutsushkata riksishpa mañashkata chaskishpapishmi llankashka, kayshina llankaywanka llaktayukman alli kawsayta chayachina munaywanmi paktarishka.
“Wiñaykawsay makanakukpak ushay yuyaywanllatak, ñukanchik llakta allpamanta mitmakkunata sinchita atirishpa llukshichishka nunaywanllatakmi, llakichiypushayta, hatunyarishkata, anchawaklliychishkatapash shitarinakanchik. Kunanka kawsay llakichiyta, wakchayayta, chullayayta, manakamak atipanakuytami chimpapuranapak hatarina kanchik, kay 1822 watapi shinallatak ñukanchikpak, ñukanchik kari warmi wawakunapak, illakunapakpash alli llakta charinatami munanchik”, kashnami Guadalupe Llori Abarca, Mamallakta Tantanakuyta pushak, kay Batalla del Pichincha Ishkay Patsakniki watakuna paktashka yuyarina raymipi nirka
