Chay Orellana markapi willak hillaykunawan rimashpa, Participación Ciudadana minkashkata pushak, Héctor Yépez, runakuna, kamachikkuna, runallaktakuna, aylllullaktakuna, tantarikuna, llaktakuna chayamuchun willayta, kayayta allichina nirka, paykuna alli kamachiyman yuyayta churachun, shina Mamallakta allita llankachun alli kamachiy killkarichun nirka.
Chay Carchi llaktamanta kamachiy killkakkuna René Yandún, Fernando Burbano, Juan Carlos Yar, Javier Cadena chay llaktamanta llankakkunawan, kullkiyachikkunawan tantarirka, ishkaynikipika chay chinchaysuyu llaktapi kawsak runakuna kullki llakita charishkata rimarka.
Kay Marcela Aguiñaga, Luis Fernando Torres, Lira Villalva, Rosa Orellana uchilla tantarikuna tukurka, wanachinata, huchachinata allichinkapa mushuk kamachiyta killkanka, kay llankaytami paykunaka pushanka. Yanka rupachikta, waktayta, ismushka hampita katukpi, wiwakunata chukrichikpi wanachinkapa kamachiyta killkanka; kishpiyrishka willakta mana sakikpi, antawa llakichikpi, shuwata wanachinkapa mutsuykunata rikunka.
Shuk hatun yuyariwan kay arinishkata yanaparka, tukunami chuklla yuyaywan arinirka. Shuk killkashka pankawan kamachikkuna arinichun kayanchik, chaypimi tiksi mutsuykunata, kitipak hayñita, llaktayukkuna chaypi kachun yanapan.
Carchi llakta Colombia llaktawan saywarishka kan, kay markaka shuktak markakunamanta chikan llankaytami charin, kullki wiñarina llankaypimi chikan kan. Kay tukuri watakunapi punchanta shuktakmi kashka, ashtawanakarin, dólar kullkiwan, peso colombiano kullkiwan chimpapurakpimi shina rikurin. Shinami Tulcán llakta chawpipi kan, saywa kuchullapi achka runakunata charik kitimi kan, ishkantin Mamallaktami hatun mintalayta charin, Ipiales llakta, Colombia llaktaman 30 chinikutalla purina kan.
Kamachiy killkak Ricardo Zambrano chay Plusvalía kamachiyta rikuna riman, kallari llankayka kay kamachiy imatalla nikikunapi rimashkata riksichinami kan, maykama kamachiy paktashkatapash rikuna, kipamanka Ecuador llaktapi kawsak runakunaman imashina yanapachun mashna mushukyaykuna tiyanata rikunka.
Kay Participación Ciudadana y Control Social minkashkaman yaykurishka kamachiy killkakkuna kay chashka puncha, 10h00 sayllamanta Orellana markapi tantarinka, chaypimi Código del Sistema de Participación Ciudadana y Control Social kamachiyta rimanakunka. Manarak kallarishpa, 09h30 sayllata, willay hillaykunawan shuk rimayta charinka, llaktakunaman willayta chayachinka.
Kay Biodiversidad minkashka Antisuyu llaktaman rinka, chay llaktapi Mamallakta Tantanakuyman mana chayamuk runakunapak rimashkata, yuyayta riksinka, chaypimi Circunscripción Amazónica kamachiy alli killkarichun paykunapak yuyayta churanka, shinami kay minkashkata pushak, Johanna Cedeño kamachiy killkak rimarka.
Kay Grupo Parlamentario por los Derechos de las Mujeres tantari, Mamallakta Tantanakuy, ONU Mujeres tantari, Consejo Nacional para la Igualdad de Género tantari, Secretaría General Iberoamericana tantari, kay Prevención de Violencia contra las Mujeres kamachiy hawa rimanakuyta charinka.
Chay Guayaquil llaktata kamarinaka chay llaktapi llankashpami kan. Mamallakta Tantanakuyta pushak, José Serrano Salgado Guayaquil llaktapi Mamallakta llankaywan sinchiyachun arinin, payka kapukchikkunawan, kiti ayllullakta pushakkunawan rimankuyta charirka, chay llaktakunata Mamallakta Tantanakuymanta yanapankapa arinirka. Shinallatak Guayaquil llakta wiñarishka puncha kakpi tawka aknaykunaman kuchuyarka.
